Vazirlar Mahkamasining “Uchta elektropoyezd xarid qilish” loyihasining texnik-iqtisodiy asoslarini tasdiqlash to‘g‘risidagi qarori loyihasi ishlab chiqildi.
Hujjat O‘zbekiston prezidentining 2025-yil 27-dekabrdagi “2030-yilga qadar temiryo‘l transportida mahalliy yo‘nalishlarda yo‘lovchi tashish ko‘rsatkichlarini oshirish chora-tadbirlari to‘g‘risida”gi qarori ijrosini ta’minlash maqsadida tayyorlangan.
Loyihaga ko‘ra, uchta elektropoyezd xarid qilishning umumiy qiymati 465 mlrd 121,9 mln so‘mni tashkil etadi. Shundan 408 mlrd 243,6 mln so‘mini kredit mablag‘lari, 56 mlrd 878,4 mln so‘mini esa “Shahar atrofida yo‘lovchi tashish” MChJning o‘z mablag‘lari hisobidan moliyalashtirish ko‘zda tutilgan.
Xarid qilinadigan har bir elektropoyezd oltita vagondan iborat bo‘ladi. Shu tariqa, loyiha doirasida jami 18 ta vagondan iborat uchta elektropoyezd xarid qilinishi rejalashtirilgan.
Yangi elektropoyezdlar ishga tushirilgach, yiliga 2 mln 702,4 ming nafar yo‘lovchiga xizmat ko‘rsatish imkoniyati yaratilishi kutilmoqda.
Loyiha doirasida mashina va uskunalar uchun 416 mlrd 595,6 mln so‘m sarflanishi belgilangan. Investitsiya davridagi moliyaviy xarajatlar 48 mlrd 13,9 mln so‘mni, boshqa xarajatlar esa 512,5 mln so‘mni tashkil etadi. Qurilish-montaj ishlari uchun alohida mablag‘ ajratish nazarda tutilmagan.
Shuningdek, loyiha natijasida 13 ta yangi ish o‘rni yaratilishi rejalashtirilgan. Investitsiya davri 9 oy etib belgilangan.
Kredit va boshqa qarz mablag‘larini qaytarish muddati 60 oyni tashkil etadi. Bunda 12 oylik imtiyozli davr nazarda tutilgan.
Qaror loyihasida uchta elektropoyezd xarid qilish loyihasining texnik-iqtisodiy asoslari belgilangan tartibda ishlab chiqilgani va kompleks ekspertizadan o‘tkazilgani qayd etilgan.
