Pskov shahar sudi sudyasi Viktoriya Malyamova «Yabloko» partiyasi raisi o‘rinbosari Lev Shlosbergni Rossiya armiyasini takroran «obro‘sizlantirish» (280.3-modda, 1-qismi) va harbiy «feyklar» tarqatishda (207.3-modda, 2-qismi «d» bandi) aybdor deb topib, 11 yil-u bir oy muddatga ozodlikdan mahrum etish to‘g‘risida hukm chiqardi.
Prokuror Anna Goryacheva siyosatchini 12 yil-u bir oy muddatga ozodlikdan mahrum etishni so‘ragandi. Hukm oldingi jazo inobatga olingan holda chiqarilgan – 2025-yil noyabrda «chet el agenti» majburiyatlariga rioya etmagani uchun Shlosbergga 420 soatlik majburiy mehnat jazosi tayinlangandi.
Unga nisbatan armiyani «obro‘sizlantirish» bo‘yicha ish ochilishiga «Odnoklassniki»da tarixchi Yuriy Pivovarov bilan debati videosini joylashtirgani sabab bo‘lgandi, debatda u Rossiyaning Ukraina bilan urushini darhol to‘xtatish zarurligini yoqlagan. Shlosbergning qayd etishicha, uni «debatdagi muxolifining fikrlarini tarqatishda, ya’ni o‘zi bahslashgan pozitsiyani tarqatishda» ayblashgan.
«Feyklar» to‘g‘risidagi ish esa Shlosbergning telegram-kanalida 2022-yil 25-fevral kuni «Exo Moskvy» nashrining Britaniyadagi Daily Mirror gazetasining birinchi sahifasi joylashtirilgan postini repost qilishi tufayli ochilgan. O‘sha sahifada qonga belangan ayol va Vladimir Putin tasvirlangan, shuningdek, «Uning qoni... Uning qo‘llari» yozuvi yozilgandi. Siyosatchi ushbu repost Rossiyada armiya haqidagi «feyklar» to‘g‘risidagi qonun (qonun Rossiya Federatsiyasi Prezidenti tomonidan 2022-yil 4-mart kuni imzolangandi) paydo bo‘lishidan oldin amalga oshirilganiga urg‘u qaratgan.
14-avgust kuni Pskov shahar sudida muzokara bo‘lib o‘tdi – unda siyosatchining advokatlari qatnasha olmadi (ikkitasi boshqa sud jarayonlari bilan band edi, uchinchisi shifoxonaga tushib qolgandi). Ammo sudya Malyamova sud majlisini keyinga qoldirmadi va Shlosbergning e’tirozlariga qaramay, uning uchun davlat tomonidan tayinlangan advokatni taklif qildi. Holbuki, jinoyat-protsessual kodeksiga ko‘ra, ayblanuvchi muayyan advokat xizmatidan voz kechish huquqiga ega. Natijada siyosatchi muzokaralarda ishtirok etmadi.
O‘sha kuni Shlosberg so‘nggi so‘z bilan chiqish qildi. Sudya muntazam ravishda siyosatchining gapini bo‘lib, uning nutqiga aralashdi. Xususan, Shlosberg Rossiya va Ukraina o‘rtasida o‘t ochishni to‘xtatish zarurligi haqida gapirganida, sudya uning gapini bo‘lib qo‘yib, buni «bayon qilingan holatlar ko‘rib chiqilayotgan jinoiy ishga aloqador emasligi» bilan izohlagan.
Lev Shlosberg – urushga ochiqchasiga qarshi chiqqan va shu bilan birga Rossiyada qolgan kam sonli rossiyalik siyosatchilardan biridir. U 2022-yildan beri aynan urushga qarshi pozitsiyada turib kelgan: u doimo birinchi navbatda harbiy harakatlarni to‘xtatishni talab qilgan. Shu sababli u hamda mamlakatni tark etgan blogerlar va siyosatchilar o‘rtasida ziddiyatlar yuzaga kelgan. Xususan, publitsistlar Viktor Shenderovich va Sergey Parxomenko Shlosbergni birinchi navbatda harbiy harakatlarni to‘xtatish tarafdori ekani uchun tanqid qilishgan. Siyosatchining o‘zi Ukraina qurolli kuchlarini qo‘llab-quvvatlovchi siyosiy muhojirlarni ular «harbiy harakatlar Kursk oblastiga ko‘chgani, harbiy xizmatchilar va tinch aholi o‘rtasida qurbonlar bo‘lganidan xursandchilik qilishgani» tufayli «begona qondagi partiya» deb atagan.
Shlosberg o‘z pozitsiyasi haqida shunday yozgandi:
Agar siyosatchi o‘z mamlakati fuqarolariga o‘lim tilashni boshlasa, u endi ushbu mamlakat siyosatchi emas. <…> Vatandan, jumladan, seni quvg‘in qilgan vatandan ayrilish – og‘ir sinov. Bu sinovdan o‘tish uchun mamlakatga aloqadorlik rishtalari tushunchasini saqlab qolish kerak – hatto xalq seni tushunmagan va qabul qilmagan, seni zaharlagan va o‘lim tilagan shunday og‘ir pallalarda ham. Sen o‘z xalqingga o‘lim, qayg‘u, baxtsizlik tilamasliging kerak – xorijdaligingda ham, qamoqda yoki qamoq xavfi ostida bo‘lsang ham. Agar, albatta, sen bu xalqni va mamlakatni o‘zingniki deb bilsang.
2023-yil iyunda Shlosberg «chet el agenti» deb e’lon qilingan, keyin esa armiyani «obro‘sizlantirish» haqidagi modda va «chet el agenti» majburiyatlariga rioya etmaslik bo‘yicha bir necha bor jarimaga tortilgan. Siyosatchi 2025-yil iyundan armiyani «obro‘sizlantirganlik» uchun uy qamog‘ida o‘tirgan. O‘sha yil dekabrida – «feyklar» bo‘yicha jinoiy ish ochilganidan keyin uni tergov izolyatoriga joylashtirishgan.
2014-yil avgustida direktori Shlosberg bo‘lgan «Pskov guberniyasi» gazetasi Ukraina sharqidagi janglarda halok bo‘lgan pskovlik desantchilarning dafn marosimi haqida xabar bergan. RF mudofaa vazirligi o‘sha vaqtda Rossiya muntazam armiyasi harbiy qismlarining Ukraina sharqidagi harbiy harakatlarda ishtirok etayotganini qat’iyan rad etib, faqat ushbu harbiy xizmatchilar harbiy mashg‘ulotlar chog‘ida halok bo‘lganini tan olgandi. O‘sha maqola e’lon qilinganidan ko‘p vaqt o‘tmay Shlosberg hujumga uchragan: u miya chayqalishi va boshqa jarohatlar bilan shifoxonaga tushib qolgandi.
