Financial Times (FT) nashrining yozishicha, global taqdimot 18-avgust kuni boshlanadi. Kompaniyaning o‘zi esa bu qadamni sun’iy intellektning voyaga yetmaganlarga ta’siri yuzasidan jamoatchilikdagi noroziliklar fonida qo‘ymoqda.
O‘smirlar uchun mo‘ljallangan versiyada o‘ziga-o‘zi shikast yetkazish (self-harm), zo‘ravonlik, ovqatlanish buzilishi va jinsiy hayotga oid tasvir va materiallarni generatsiya qilishga cheklovlar kuchaytiriladi. ChatGPT’da avvaldan mavjud bo‘lgan ota-ona nazorati funksiyasi o‘z joniga qasd qilish haqidagi suhbatlar kabi keskin vaziyatlarda ogohlantirishlar yuborgan bo‘lsa, endi bunday bildirishnomalar zo‘ravonlik va ovqatlanish buzilishi mavzulariga ham qo‘shildi. O‘smirlar va oilalar bilan ishlash bo‘limi rahbari Loren Jonas bu funksiyalarning kechikishini kompaniya o‘smirning shaxsiy daxlsizlik huquqi hamda ehtimoliy zararning jiddiyligi o‘rtasida muvozanat topishiga to‘g‘ri kelayotgani bilan izohladi.
FT’ning yozishicha, yangilanish OpenAI bir tomondan, farzandlari chat-bot bilan muloqotdan jabr ko‘rganini da’vo qilayotgan oilalarning bir nechta da’volariga qarshi kurashayotgan, ayni paytda esa kelgusi yil ichida ehtimoliy rekord darajadagi aksiyalarni joylashtirishga tayyorgarlik ko‘rayotgan bir paytda chiqmoqda. Da’vogarlar orasida o‘z o‘limini ChatGPT bilan muhokama qilgach o‘z joniga qasd qilgan kaliforniyalik 16 yoshli Adam Reynning yaqinlari ham bor; sud materiallariga ko‘ra, bot unga batafsil ko‘rsatmalar bergan. Fevral oyida Kanadaning Tambler-Rij shahridagi maktabda sodir bo‘lgan ommaviy otishmada halok bo‘lganlarning oilalari ham da’vo arizasi bilan murojaat qilishdi: ma’lum bo‘lishicha, otishma sodir etgan o‘smir hujumdan bir necha oy oldin ChatGPT bilan zo‘ravonlik qilish niyatini o‘rtoqlashgan, uning akkaunti bloklangan, biroq kompaniya huquqni muhofaza qilish idoralariga xabar bermagan.
OpenAI qoidalariga ko‘ra, 13 yoshdan kichik bolalarga chat-botdan foydalanish taqiqlanadi, voyaga yetmaganlar uchun esa ota-onaning roziligi talab etiladi. Xizmat o‘smirlar versiyasini kimga ko‘rsatishni foydalanuvchi ko‘rsatgan yosh va bir qator bilvosita xulq-atvor belgilariga qarab aniqlaydi. O‘smirlar uchun mo‘ljallangan ChatGPT tanaffuslar haqida tez-tez eslatib turadi va «sukunat soatlari»ni qo‘llab-quvvatlaydi - bular foydalanuvchi yoki ota-onalar botga kirishni cheklash uchun o‘zi belgilashi mumkin bo‘lgan vaqt oraliqlaridir.
FT’ning yozishicha, kompaniya neyrotarmoqning bir zumdagi javoblari maktab o‘quvchilarining fikrlash va o‘rganish qobiliyatiga zarar yetkazishi haqidagi da’volarga alohida javob berishga harakat qilmoqda - bu ta’sir «kognitiv yengillashuv» deb ataladi. Yangilangan «ta’lim rejimi»da bot tayyor javob berish o‘rniga, o‘smirni topshiriq bo‘yicha bosqichma-bosqich yo‘naltirishi kerak. Jonasning so‘zlariga ko‘ra, o‘smirlarning 90 foizi ChatGPT’dan aynan ta’lim maqsadida foydalanadi va xizmatni o‘quv vositasiga aylantirish kompaniyaning asosiy maqsadidir.
