Xususan, Navbahor tumanidagi “Paradice Garden” MChJning uzumni qayta ishlash va sharbat ishlab chiqarish loyihasiga 1,1 million AQSh dollari miqdorida qo‘shimcha kredit ajratilib, 70 nafar ishsiz ayol doimiy ish bilan ta’minlanadigan bo‘ldi.
Shuningdek, “Yashil Orol by Grand” MChJ tomonidan barpo etilayotgan, umumiy qiymati 10 mlrd so‘mlik (shundan 5 mlrd so‘mi bank krediti) sohilbo‘yi ekoturizm maskani loyihasi o‘rganildi. Sentyabr oyida ishga tushadigan ushbu maskanda 40 ta yangi ish o‘rni yaratiladi.
Polietilen quvurlar ishlab chiqaruvchi “Jahon savdo plast” MChJga esa 160 ming AQSh dollari kredit ajratilib, 15 nafar fuqaroning bandligi ta’minlanadi. Bundan tashqari, korxonaning oylik elektr energiyasi xarajati qariyb 45 mln so‘mni tashkil etishi inobatga olinib, 300 mln so‘mlik kredit hisobiga 100 kVt quvvatli quyosh panellari o‘rnatilishi belgilandi. Bu oyiga 30 mln so‘m tejash imkonini beradi.
“Yoshlar kuni” munosabati bilan Navoiy shahridagi “Turon” mahallasida o‘tkazilgan uchrashuvda esa yoshlarning taklif va muammolari tinglandi. Shuningdek, “Loyihalar ofisi”ga murojaat qilgan tadbirkorlar bilan muloqot o‘tkazilib, mutaxassislar ko‘magi hamda sun’iy intellekt imkoniyatlari orqali ularning g‘oyalari tayyor biznes-loyihalarga aylantirildi.
