Rossiya Ichki ishlar vazirligining qidiruv bazasida 20-avgust kuni FAZ jurnalisti Mixael Martens haqidagi ma’lumot paydo bo‘ldi.
Vazirlik bazasida jurnalist Rossiya Jinoyat kodeksi moddasi bo‘yicha qidirilayotgani ko‘rsatilgan, biroq aynan qaysi modda ekani ochiqlanmagan.
Avvalroq Rossiya OAV huquqni muhofaza qiluvchi organlardagi manbalariga tayanib, Martensga nisbatan nafrat yoki adovat qo‘zg‘atish ayblovi sirtdan qo‘yilganini xabar qilgan edi. Gap Rossiya Jinoyat kodeksining 282-moddasi 2-qismi haqida borayotgani aytilgan.
Shuningdek, tergov yaqin vaqt ichida suddan jurnalistni sirtdan hibsga olishni so‘rashni rejalashtirayotgani xabar qilindi.
Belgraddagi savol mojaroga sabab bo‘ldi
Jinoiy ishga 8-avgust kuni Belgradda Serbiya prezidenti Aleksandr Vuchich va Ukraina prezidenti Volodimir Zelenskiy ishtirokida o‘tkazilgan qo‘shma matbuot anjumanidagi holat sabab bo‘lgan.
Matbuot anjumanida Martens Zelenskiydan ingliz tilida yevropaliklar Ukrainaga «ko‘proq rossiyaliklarni o‘ldirish» uchun qanday yordam berishi mumkinligini so‘ragan. Jurnalist darhol o‘z gapiga aniqlik kiritib, «albatta, rossiyalik askarlarni», deya qo‘shimcha qilgan.
Savol Ukraina Qurolli kuchlari arsenalini qanday kengaytirish va Rossiyani muzokaralarga undash mumkinligi haqidagi muhokama paytida berilgan. Martensning ifodasi Serbiya prezidenti Aleksandr Vuchichning ham hayratiga sabab bo‘lgan.
FAZ matbuot kotibi jurnalist aslida ekspertlar o‘rtasida muhokama qilinayotgan - Rossiya armiyasi uchun shaxsiy tarkib bilan bog‘liq qiyinchiliklarni qanday yuzaga keltirish va shu orqali Moskvani tinchlik muzokaralariga undash mumkinligi haqidagi masalani nazarda tutganini tushuntirgan.
FAZ savol «noaniq» yangraganini tan oldi
FAZ tahririyati jurnalistning savoli yuzasidan afsus bildirib, uning ifodasi «noaniq» yangraganini qayd etgan. Gazeta tahririyati Rossiya harbiylarini imkon qadar ko‘proq o‘ldirishga chaqirmasligini ta’kidlagan.
Shu bilan birga, FAZ Ukraina xalqaro huquq bilan kafolatlangan o‘zini o‘zi mudofaa qilish huquqiga ega ekanini qo‘llab-quvvatlashini va Rossiyaning Ukrainaga qarshi urushini imkon qadar tezroq tugatish tarafdori ekanini bildirgan.
Nashr matbuot xizmati, shuningdek, so‘z erkinligi, ayniqsa matbuot anjumanlarida, savol berish huquqini ham o‘z ichiga olishini ta’kidlagan.
Germaniya Jurnalistlar uyushmasi (DJV) ham Martensning Rossiyada jinoiy ta’qib qilinishiga qarshi chiqdi. Tashkilot raisi Mika Boyster Moskvada nemis jurnalistiga qarshi «ko‘rgazmali sud jarayoni» o‘tkazilishiga yo‘l qo‘ymaslik kerakligini aytdi.
