24-avgust kuni Rossiyaning bir nechta hududida Ozon kompaniyasiga qarashli logistika markazlari dronlar hujumiga uchradi.
Kompaniya maʼlumotiga koʻra, Adigeyadagi Ozon logistika markaziga uchuvchisiz uchish apparati zarbasidan soʻng yirik yongʻin boshlangan.
Ombordagi barcha xodimlar evakuatsiya qilingan. Dastlabki maʼlumotlarga koʻra, jabrlanganlar yoʻq. Voqea joyida favqulodda xizmatlar ishlamoqda, logistika markazining faoliyati esa toʻxtatilgan.
Xavfsizlik maqsadida ushbu markazda saqlanayotgan tovarlarni onlayn buyurtma qilish imkoniyati vaqtincha cheklanadi. Sotuvchilardan tovarlarni qabul qilish ham toʻxtatilgan, omborga yoʻnaltirilgan logistika marshrutlari bekor qilinib, yuklar boshqa obyektlarga yoʻnaltiriladi.
Nevinnomiskda 93 ming kvadrat metrlik ombor yonmoqda
Stavropol oʻlkasidagi Nevinnomisk shahrida ham Ozonʼning yirik logistika markazi hujumga uchragan.
ASTRA keltirgan OSINT-tahlilga koʻra, dron hujumidan keyin omborda yongʻin boshlangan. Binoning umumiy maydoni 93 514 kvadrat metrni tashkil etadi.
Mazkur markaz oziq-ovqat va nooziq-ovqat mahsulotlarini saqlash va saralash, buyurtmalarni jamlash hamda ularni mijozlarga joʻnatish uchun moʻljallangan.
Stavropol oʻlkasi aholisi portlash ovozlari eshitilganini bildirgan. Hudud gubernatori Vladimir Vladimirovning maʼlum qilishicha, havo hujumidan mudofaa kuchlari Nevinnomisk sanoat zonasiga qaratilgan dronlar hujumini qaytarmoqda.
Mahachqalʼada bir necha kishi jabrlandi
24-avgust kuni soat taxminan 05:00 da Mahachqalʼadagi Ozon logistika markazi ham dronlar hujumiga uchragan.
Kompaniya matbuot xizmati maʼlumotiga koʻra, obyektdagi tizimlar belgilangan tartibda ishlagan va xodimlar tezkor ravishda evakuatsiya qilingan.
Dastlabki maʼlumotlarga koʻra, bir necha kishi jabrlangan. Ular tibbiyot xodimlari tomonidan koʻrikdan oʻtkazilgan. Kompaniya jabrlanganlarning hayoti va sogʻligʻiga xavf yoʻqligini bildirgan.
Logistika markazida yongʻin boshlangan, voqea joyida favqulodda xizmatlar ishlamoqda. Ombor faoliyati vaqtincha toʻxtatilgan.
Krasnodarda ikki bola halok boʻlgani aytildi
Shu kecha Krasnodarda ham bir necha marta havo xavfi sirenalari yangragan. «Ostorojno, novosti» Telegram-kanali maʼlumotiga koʻra, portlashlardan keyin shaharda qora tutun koʻtarilgan va hududlardan birida yongʻin chiqqan.
