«Prezident sovgʻasi» sifatida 1-sinf oʻquvchilari uchun ajratilgan oʻquv qurollarining ortib qolgan qismi keyingi yili ham ishlatiladi. Bu haqda hukumatning qarorida belgilandi.
Qarorga koʻra, prognoz koʻrsatkichlari asosida joriy oʻquv yili uchun umumiy oʻrta taʼlim maktablariga qabul qilingan 1-sinf oʻquvchilari soniga mos ravishda tarqatilgan oʻquv qurollari toʻplamidan ortib qolgan qismi keyingi oʻquv yili uchun davlat xaridlarini amalga oshirishda inobatga olinadi.
Bunda keyingi oʻquv yiliga qadar yaroqlilik muddati tugaydigan oʻquv qurollari Maktabgacha va maktab taʼlimi vazirligi tomonidan davlat maktabgacha taʼlim tashkilotlarining majburiy maktabga tayyorlov guruhlariga foydalanish uchun bepul ajratiladi.
Maktabgacha va maktab taʼlimi vazirligi axborotiga koʻra, joriy yilda birinchi sinfga qabul qilinadigan 795 mingdan ortiq oʻquvchiga «Prezident sovgʻasi» topshirilishi kutilmoqda. Toʻplamga oʻquv sumkasi, 12 ta daftar, ruchka, 2 ta oddiy qalam, rangli qalamlar toʻplami, rangli qogʻoz, plastilin, rasm daftari, 2 ta oʻchirgʻich, rangli akvarel boʻyoqlari, yelim va qalamdon kiritilgan.
