Oʻzbekiston prezidenti Shavkat Mirziyoyev 28-avgust kuni Singapur katta vaziri Li Syan Lun boshchiligidagi delegatsiyani qabul qildi.
Maʼlumot uchun, Li Syan Lu – Singapur asoschisi Li Kuan Yuning oʻgʻli. U 2004–2024-yillarda Singapur bosh vaziri edi. Shavkat Mirziyoyev 2023-yil yanvar oyida Singapurga amalga oshirgan davlat tashrifida Li Syan Lu bilan muzokaralar oʻtkazgan.
Suhbat avvalida katta vazir Singapur prezidenti Tarman Shanmugaratnam va bosh vaziri Lourens Vongning samimiy salomi hamda ezgu tilaklarini yetkazdi.
Oʻzbekiston – Singapur munosabatlari izchil rivojlanib borayotgani mamnuniyat bilan qayd etildi. Siyosiy muloqot hamda barcha darajalardagi ikki tomonlama aloqalar faol qoʻllab-quvvatlanmoqda.
Tovar ayirboshlash hajmi va qoʻshma korxonalar soni jadal surʼatlarda oʻsib bormoqda. Singapurning Oʻzbekiston iqtisodiyotiga kiritgan investitsiyalari hajmi qariyb 2 milliard dollarni tashkil etdi.
Singapur ishbilarmonlarining yurtimizdagi investitsiyaviy faoliyatini kengaytirish rejalari qoʻllab-quvvatlandi. Strategik va innovatsion sheriklik boʻyicha oʻrta muddatli qoʻshma dasturni ishlab chiqib, unda savdo, investitsiyalar, texnologiyalar transferi, davlat boshqaruvi tizimini modernizatsiya qilish, inson kapitalini rivojlantirish, raqamlashtirish va boshqa yoʻnalishlarga ustuvorlik berishga kelishib olindi.
Oʻzbekistonda maxsus iqtisodiy zonalar faoliyatini takomillashtirish, Toshkent xalqaro moliya markazi va raqamli bank tizimini rivojlantirishda Singapurning ilgʻor tajribasini joriy etishga alohida eʼtibor qaratildi.
Singapur oliy taʼlim muassasalarining Oʻzbekistondagi faoliyati bundan buyon ham qoʻllab-quvvatlanishi bildirildi.
Yuqori darajada erishilgan kelishuvlarni amalga oshirish jarayonini baholash va qoʻshma rejalarni muvofiqlashtirish uchun siyosiy va iqtisodiy tuzilmalar oʻrtasida muntazam muloqotni yoʻlga qoʻyish zarurligi taʼkidlandi.
Yaqinda Oʻzbekiston BMTning Mediasiya toʻgʻrisidagi Singapur konvensiyasiga qoʻshilgani olqishlandi.
