Oʻzbekistonda tovar va xizmatlar uchun toʻlovlarni naqd pul shaklida amalga oshirish mumkin boʻlgan chegaraviy miqdor oshirildi.
2026-yil 1-apreldan kuchga kirgan tartibga asosan, qiymati 25 mln soʻmdan oshadigan tovar va xizmatlar uchun toʻlovlarni naqd shaklda amalga oshirish taqiqlangan edi.
28-avgustdan eʼtiboran, bu chegara bazaviy hisoblash miqdorining 400 baravari deb belgilandi. 1-sentabrdan eʼtiboran bazaviy hisoblash miqdori 412 ming soʻmdan 440 ming soʻmga oshadi, shunga muvofiq, 440 BHM – 1-sentabrgacha 164,8 mln soʻm, 1-sentabrdan 176 mln soʻmga teng boʻladi.
Ushbu yangilik davlat rahbarining tadbirkorlar bilan muloqotida belgilangan vazifalar ijrosi yuzasidan 27-avgust kuni qabul qilingan prezident farmonida koʻzda tutilgan. Farmon 28-avgustdan kuchga kirdi.
Ayni paytda, qishloq xoʻjaligi mahsulotlariga nisbatan istisno saqlab qolinmoqda, yaʼni qishloq xoʻjaligi mahsulotlarining istalgancha qiymatdagi oldi-sotdisida naqd pul bilan toʻlov qilish mumkin.
Shuningdek, muayyan tovar va xizmatlarga har qanday summadagi toʻlovlarni faqat naqdsiz amalga oshirish tartibi ham saqlab qolindi. Bu tovar va xizmatlarga quyidagilar kiradi:
- davlat organlari tomonidan koʻrsatiladigan xizmatlar;
- elektr energiyasi, tabiiy gaz, ichimlik suvidan foydalanganlik uchun toʻlovlar (bundan bank kassalari orqali amalga oshiriladigan toʻlovlar mustasno);
- alkogol va tamaki mahsulotlari;
- transport vositalariga yoqilgʻi quyish shoxobchalari orqali aholiga neft-gaz mahsulotlarini sotish va elektrda harakatlanadigan transport vositalarini zaryadlash boʻyicha xizmatlar;
- koʻchmas mulk obyektlari, ishlab chiqarilganiga oʻn yildan oshmagan M, N, O va G toifaga kiruvchi transport vositalari hamda maxsus avtotransport vositalari.
