AQSH Qurolli kuchlari yakshanba, 30-avgust kuni Hoʻrmuz boʻgʻozida joylashgan Eronning Larek orolidagi ikkita raketa qurilmasiga zarba berdi. Bu haqda AQSH Markaziy qoʻmondonligi (CENTCOM) maʼlum qildi.
Amerika harbiylari maʼlumotiga koʻra, Eron Islom inqilobi muhofizlari korpusi kuchlari Larek orolidan Hoʻrmuz boʻgʻozi tomon dengiz minalarini olib boruvchi raketalarni uchirishga tayyorgarlik koʻrayotgan boʻlgan.
CENTCOM matbuot kotibi Tim Xokinsning bildirishicha, AQSH harbiylari oʻtgan hafta Hoʻrmuz boʻgʻozidagi xalqaro savdo kemalari harakatlanadigan yoʻllarni minalardan tozalash ishlarini yakunlagan.
AQSH prezidenti Donald Tramp ham bir hafta avval Tehronga dengizga mina joylashtiradigan har qanday kema yoki boshqa suzish vositasi “zudlik bilan va tizimli ravishda yoʻq qilinishi” haqida ogohlantirish berilganini aytgan edi.
Larek oroli Eron sohilidan bir necha dengiz mili uzoqlikda, strategik ahamiyatga ega Hoʻrmuz boʻgʻozida joylashgan.
Eron Islom inqilobi muhofizlari korpusi AQSH zarbasiga javoban Vashington bu hujum uchun “iqtisodiy va harbiy jabhada javob berishi”ni bildirdi.
Eronning Islom inqilobi muhofizlari korpusiga yaqin Tasnim agentligi maʼlumotiga koʻra, Larek oroliga zarba uchuvchisiz uchish apparati orqali berilgan. Hujum oqibatida ikki kishi halok boʻlgan va yana ikki kishi yaralangan.
AQSH Eronga oxirgi marta iyul oyi oxirida zarba bergan edi. Shundan keyin prezident Donald Tramp Tehron bilan Hoʻrmuz boʻgʻozining kelajagi, sanksiyalar hamda Eron yadro dasturi boʻyicha muzokaralarni davom ettirish istagini bildirib, harbiy zarbalarni toʻxtatgandi.
Biroq tomonlar oʻrtasidagi muzokaralarda sezilarli natijaga erishilmagan. Keyinchalik Tramp maʼmuriyati Eronga nisbatan harbiy bosim oʻrniga iqtisodiy bosimni kuchaytirishga urgʻu berdi.
Hoʻrmuz boʻgʻozi AQSH va Eron oʻrtasidagi qarama-qarshilikning asosiy nuqtalaridan biri boʻlib qolmoqda. U jahon neft savdosi uchun strategik ahamiyatga ega dengiz yoʻli hisoblanadi.
AQSH harbiylari boʻgʻozda xalqaro savdo kemalarining erkin harakatini taʼminlashga tayyor ekanini bildirgan. Eron esa AQShning yangi zarbasiga javob choralari koʻrilishini maʼlum qilgan.
