Transfer shartlari
29 yoshli hujumchi kataloniyaliklar bilan 2029-yilning 30-iyunigacha moʻljallangan shartnoma imzoladi. Transfer summasi rasman oshkor etilmayapti, biroq OAV maʼlumotlariga koʻra, «Barselona» «Arsenal»ga taxminan 10 mln yevro toʻlaydi. Bundan tashqari, 4 mln yevrogacha bonuslar koʻzda tutilgan, shuningdek, London klubiga futbolchining kelajakdagi sotuvidan tushgan mablagʻning 20 foizini olish huquqi taqdim etilgan.
«Barsa» nega aynan Jezusni tanladi?
Kataloniyaliklar Robert Levandovski ketganidan buyon klassik markaziy hujumchi izlayotgan edi. Dastlab «Atletiko Madrid» aʼzosi Xulian Alvares asosiy nishon sifatida koʻrilayotgandi, biroq Madrid klubi argentinalik futbolchining sotuvi boʻyicha muzokara olib borishdan bosh tortdi. Natijada «Barselona» eʼtiborini Jezusga qaratdi, u «Arsenal»da Kay Havers va Viktor Dyokereshga raqobatni boy berib, asosiy tarkibdagi oʻrnini yoʻqotgandi.
Murabbiyning munosabati
«Barselona» bosh murabbiyi Hansi Flik «Rayo Valyekano» ustidan qozonilgan gʻalabadan soʻng ushbu kelishuvga izoh berdi:
«Toʻgʻrisi, uni qoʻlga kiritish imkoniyati paydo boʻlganidan biroz hayron boʻldim. Uning oʻyin uslubi menga juda yoqadi - bu bizning uslubimizga mos tushadi. Oʻylaymanki, u oʻyinlarda bizga katta yordam bera oladi. U biz uchun muhim oʻyinchiga aylanishi mumkin, shuning uchun [sport direktori] Dekoga rahmat - u yana bir bor ajoyib ishga qoʻl urdi».
Futbolchining faoliyati
Gabriel Jezus 1997-yil 3-aprelda Braziliyaning San-Paulu shahrida tugʻilgan. Faoliyatini «Palmeyras» klubida boshlab, mamlakat kubogi va chempionatini yutgan, shundan soʻng 2016-yili Xosep Gvardiola boshchiligidagi «Manchester Siti»ga oʻtgan. U «Siti» safida 236 ta oʻyin oʻtkazib, 95 ta gol urgan va 45 ta golli uzatmani amalga oshirgan. Shuningdek, toʻrt marta Angliya chempionligi, Angliya Kubogi va boshqa sovrinlarni qoʻlga kiritgan.
2022-yil iyul oyida hujumchi «Arsenal»ga oʻtdi va bu jamoada 123 ta uchrashuvda maydonga tushib, 32 ta gol urdi. 2025-yil yanvar oyida u tizzasining xochsimon bogʻlamidan ogʻir jarohat oldi va faqat dekabrga kelib maydonga qaytdi hamda «toʻpchilar»ga 2025/26-yilgi mavsum chempionligini qoʻlga kiritishda yordam berishga ulgurdi.
Jezus «Barselona» hujum chizigʻini yozning boshqa yangi futbolchilari - Entoni Gordon va Karim Adeyemi bilan birgalikda toʻldiradi.
