Andijon viloyati Qoʻrgʻontepa tumanidagi nogironligi boʻlgan bolalar uchun “Gʻamxoʻrlik” markazida tarbiyalanuvchilarga jismoniy zoʻravonlik qilingan va stolga bogʻlab qoʻyilgan. Kun.uz'ga kelib tushgan videolarda nogironligi boʻlgan bolalarga nisbatan ayovsiz munosabatda boʻlingani, ular kaltaklangani aks etadi.
Tarbiyachilar qoʻllarida kaltak bilan bolalarni nazorat qilishgan. Erkak xodim bolalardan birini uloqtirib yuborganini koʻrish mumkin. Videolardan birida bola tarbiyachining yelkalarini uqalayotgani ham koʻrinadi. Bolalar majburan bogʻlab qoʻyilgan.
Bundan tashqari, Kun.uz bilan bogʻlangan murojaatchining aytishicha, tarbiyalanuvchilardan biri texnik xodim tomonidan kameralar yoʻq xonada kaltaklangan. Voqeani boshqa tarbiyalanuvchi koʻrgan va bu haqda boshqa xodimlarga ishoralar orqali xabar berishga uringan. Kaltaklangan bola ruhiy kasalliklar shifoxonasiga yuborilgan. Uning onasi markazga IIB xodimi bilan kelganda esa bolani olib ketishiga va tibbiy ekspertizaga murojaat qilishiga ruxsat berilmagan. Aks holda bola markazdan batamom ketishini aytib, tahdid qilingan. Hozircha bu daʼvolar rasman tasdiqlanmagan, ammo markaz faoliyatini chuqur tekshirish zarurligini koʻrsatadi.
Murojaat muallifi voqeaga aloqador kamera yozuvlari oʻchirilganini aytmoqda.
Agentlik: 7 nafar xodim ishdan boʻshatildi
Ijtimoiy himoya milliy agentligi holatni tasdiqladi va rasmiy munosabat bildirdi. Agentlikning hududiy boshqarmasi oʻtkazgan oʻrganish natijalariga koʻra, videolarda aks etgan 6 nafar tarbiyachi va 1 nafar hamshira egallab turgan lavozimidan ozod qilingan. Ular bilan tuzilgan mehnat shartnomalari qonunchilikda belgilangan tartibda bekor qilingan. Tarbiyachi xodimlarning ish faoliyatini yetarlicha nazorat qilmagan masʼul xodimlarga nisbatan intizomiy choralar koʻrilgan. “Gʻamxoʻrlik” markazida bolalar uchun moʻljallangan oʻyin maydonchalari atrofiga qoʻshimcha kuzatuv kameralari oʻrnatilgan.
Biroq munosabatda bolalarga nisbatan jismoniy zoʻravonlik holatlariga huquqiy baho berilgani, huquqni muhofaza qiluvchi organlarga materiallar yuborilgani yoki jinoyat alomatlari boʻyicha tekshiruv boshlangani haqida maʼlumot keltirilmagan.
