Apple ikkita iPhone’da bitta eSIM’dan foydalanishga ruxsat beradi - bu imkoniyat iOS 27 tizimida iPhone Handoff funksiyasi tufayli paydo boʻladi. U haqda ilk bor WWDC 2026 anjumanida soʻz yuritilgan, biroq kompaniya tafsilotlarni oshkor qilmagandi.
Endi MacRumors nashri tafsilotlar bilan oʻrtoqlashdi. Unga koʻra, funksiya faollashtirilganda, asosiy iPhone oʻzidagi SIM-kartani saqlab qoladi, ikkinchisiga esa alohida nusxalovchi versiya biriktiriladi. Bu bitta raqamni saqlagan holda gadjetlar oʻrtasida tezda almashish imkonini beradi.
Aloqa sozlamalari asosiy qurilmada qoladi, geolokatsiya esa ayni paytda raqamdan foydalanilayotgan iPhone orqali aniqlanadi. Funksiyani «Sozlamalar» → «Uyali aloqa» menyusi orqali yoqish mumkin boʻladi.
Biroq iPhone Handoff ishlashi uchun mobil aloqa operatorlari tomonidan qoʻllab-quvvatlanishi kerak. Dastlabki maʼlumotlarga koʻra, uni birinchi boʻlib T‑Mobile (AQSH) va Germaniyadagi Deutsche Telekom mijozlari faollashtira oladi.
iOS 27 taqdimoti oy oxirida kutilmoqda, kelasi hafta esa Apple kompaniyasi iPhone 18 Pro, iPhone 18 Pro Max va buklanadigan iPhone Ultra’ni taqdim etadi.
