Kaplunovning gʻoyib boʻlishi
«Ukrainskaya pravda» nashrining yozishicha, mojaro «Rossiya koʻngillilar korpusi» Ukraina boʻlinmasi komandiri oʻrinbosari Stepan Kaplunovning gʻoyib boʻlishi fonida boshlangan. U 23-avgust kuni Kiyevdagi hovlisidan nomaʼlum shaxslar tomonidan olib ketiladi. Mazkur holat huquqiy jihatdan jiddiy savollarni yuzaga keltirgan, chunki jarayon hech qanday protsessual doiralarsiz amalga oshirilgan: ushlab turish bayonnomasi tuzilmagan, advokat va tarjimon ishtiroki taʼminlanmagan va gumondorning oʻziga rasmiy ayblov qoʻyilmagan. Bir haftadan koʻproq vaqt davomida Kaplunovning safdoshlari va advokatiga uning holati haqida aniq maʼlumot berilmagan. «Rossiya koʻngillilar korpusi» (RDK) shtab boshligʻi Aleksandr Fortuna ham qator kuchishlatar idoralarga rasmiy soʻrovlar yuborgani, ammo hech biridan aniq javob ololmaganini maʼlum qilgan. Keyinchalik hibsdan ozod etilgan Kaplunov Radio NV nashriga began intervyusida vaziyatni quyidagicha izohlagan.
«Meni yerga yotqizishdi, qoʻllarimga kishan taqishdi. Umuman olganda, tergov harakatlari va hibsga olish jarayonlari qanday boʻlishini ozmi-koʻpmi tushunaman. Odatda gumonlanuvchiga qaysi moddalar boʻyicha qanday ayblov qoʻyilgani aytiladi. Bu yerda esa meni shunchaki qora BMW avtomobiliga tiqishdi. Ochigʻini aytganda, bu oʻgʻirlash edi. Shundan soʻng qoʻllarimni kishanlagan, koʻzlarim skotch bilan bogʻlangan holda olib borishdi. Menimcha, bu qandaydir maxsus rejimdagi obyekt yoki, boshqacha aytganda, yashirin qamoqxona boʻlgan. U yerda meni kameraga joylashtirishdi, qoʻllarimni kishan va zanjir bilan bogʻlashdi. Bir necha sutka davomida koʻzlarim ham doim yopiq holda boʻldi», deya taʼkidlagan u
Keyinchalik Ukraina Xavfsizlik xizmatidagi (SBU) manbalar Kaplunov Rossiya Federal Xavfsizlik xizmati bilan ehtimoliy aloqalarda gumonlanib olib ketilganini bildirgan.
Shumskiy koʻchasidagi otishma
1-sentabrdan 2-sentabrga oʻtar kechasi Ukraina Xavfsizlik xizmatining tezkor-tergov guruhi tintuv oʻtkazish uchun Stepan Kaplunovni yashirincha oʻz kvartirasiga olib keladi. Qandaydir tarzda bu haqidagi maʼlumot Bosh razvedka boshqarmasi (GUR) ixtiyoriga yetib boradi. Kaplunovning ushlab turilishini «oʻgʻrilik» sifatida baholayotgan GUR xodimlari va «Rossiya koʻngillilar korpusi» harbiylari tezlik bilan bu yerga kelishadi. Dastlab oʻzaro kelishuvga erishilgan boʻlsa-da, keyinchalik vaziyat nazoratdan chiqib ketadi. 2-sentabr tongida yuz bergan otishma natijasida kamida uch nafar Razvedka boshqarmasi xodimi yaralangan. Ularning ikki nafarining ahvoli ogʻir ekani aytilyapti. Otishma sababli politsiya yaqin atrofdagi bir nechta koʻchani yopgan. Voqea joyidan olingan suratlarda yaradorlar va yerdagi qon dogʻlarini koʻrish mumkin.
