Rossiya droni Kiyev markazidagi Vladimirskaya koʻchasida joylashgan Ukraina Xavfsizlik xizmati (UXX) shtab-kvartirasi binosiga zarba berdi. Bu haqda prezident Volodimir Zelenskiy UXX rahbari Oleksandr Poklad bilan suhbatdan soʻng maʼlum qildi.
Uning soʻzlariga koʻra, dron maxsus xizmat rahbarining kabinetiga yoʻnaltirilgan.
«Jabrlanganlarning barchasiga zarur yordam koʻrsatiladi», - deb qoʻshimcha qildi Zelenskiy. U shuningdek, Pokladga harbiylarni jalb qilgan holda «ruslarga bu zarbaga munosib, sezilarli va iloji boʻlsa, oʻziday qilib javob qaytarishni» topshirdi.
«Ukrainska pravda» nashrining yozishicha, mahalliy vaqt bilan taxminan soat 15:30 da sodir boʻlgan hujum paytida UXX rahbari oʻz kabinetida boʻlmagan. Voqea joyidan olingan videoda zarba tekkan binoning derazasidan quyuq tutun chiqayotganini koʻrish mumkin. Kiyev meri Vitaliy Klichkoning maʼlum qilishicha, Vladimirskaya koʻchasi oʻtgan Shevchenko tumanida dron noturarjoy binosining tomiga qulagan. Uning aytishicha, oqibatda toʻqqiz kishi jabrlangan, ulardan yetti nafari shifoxonaga yotqizilgan. Hujumdan yarim soat oldin shaharda havo trevogasi eʼlon qilingan, Havo kuchlari esa reaktiv dronlar yaqinlashayotganidan ogohlantirgan edi.
Shuningdek, UXX shtab-kvartirasi yaqinida joylashgan «Zavertyaylo» tarmogʻiga qarashli kafe ham vayron boʻlgan. Kompaniyaning xabar berishicha, bir ayol jabrlanib, shifoxonaga yotqizilgan. Qolgan mehmonlar va xodimlar yertoʻlaga yashirinishga ulgurgan.
Zelenskiy 17-iyul kuni Mudofaa vaziri boʻlgan Yevgeniy Xmaraning oʻrniga Pokladni UXX rahbari vazifasini vaqtincha bajaruvchi etib tayinlagan edi. Bungacha Poklad ushbu idora rahbari oʻrinbosari lavozimida ishlagan.
Zarba amerikalik muzokarachilarning tashrifi arafasida sodir boʻldi. TASS xabariga koʻra, AQSH prezidentining maxsus elchisi Stiv Uitkoff va Donald Trampning kuyovi Jared Kushner 5-sentabr kuni Moskvaga, 6-sentabr kuni esa Kiyevga tashrif buyuradi. Rossiya Mudofaa vazirligi UXX binosiga zarba yuzasidan izoh bermadi.
