Migratsiya agentligi E-9 vizasi asosida Koreyaga vaqtinchalik ishlash uchun borayotgan fuqarolar bilan tuziladigan uch tomonlama shartnomaning ayrim bandlarini qayta koʻrib chiqdi.
Avvalgi shartnomada fuqaro ish joyini oʻzgartirishdan oldin Migratsiya agentligining Koreya Respublikasidagi vakolatxonasi roziligini olishi hamda belgilangan talablarga rioya etilmagan holatlarda jarima qoʻllanilishi nazarda tutilgan edi.
Qayd etilishicha, ushbu talablar fuqarolarning Koreya Respublikasida noqonuniy maqomga oʻtib ketishining oldini olish, ular bilan doimiy aloqani taʼminlash hamda zarur holatlarda ijtimoiy, huquqiy va moddiy koʻmak koʻrsatish maqsadida kiritilgan edi.
Koreya Respublikasidagi ish beruvchilar va nodavlat notijorat tashkilotlari bilan oʻtkazilgan muzokaralar, shuningdek, fuqarolardan kelib tushgan murojaatlar tahlili asosida mazkur talablar qayta koʻrib chiqildi.
Natijada uch tomonlama shartnomadan ish joyini oʻzgartirish uchun Agentlik vakolatxonasining oldindan roziligini olish hamda ushbu talabga rioya etilmagan holatda jarima qoʻllashni nazarda tutuvchi bandlar chiqarib tashlandi.
Endilikda fuqarolar ish joyini oʻzgartirish uchun Migratsiya agentligining alohida roziligini olishi shart emas. Ular amaldagi tartiblar va qonunchilik asosida ish beruvchi bilan mehnat shartnomasini bekor qilishi va yangi ish beruvchi bilan mehnat munosabatlariga kirishishi mumkin.
Shartnomada Koreyada noqonuniy maqomda qolganlik uchun jarima qoʻllash bandi saqlab qolindi.
E-9 vizasi asosida ishlayotgan fuqaro ish beruvchi bilan mehnat shartnomasini bekor qilganidan soʻng 1 oy ichida ish izlovchi sifatida davlat roʻyxatidan oʻtishi va 90 kun ichida yangi ishga joylashishi lozim. Aks holda Koreya Respublikasi hududini tark etishi talab etiladi.
Belgilangan muddatda ishga joylashmagan va mamlakat hududini tark etmagan fuqaro noqonuniy maqomga oʻtishi mumkin. Bunday holatda Koreya Respublikasi qonunchiligiga muvofiq jarima, deportatsiya hamda mamlakatga qayta kirishga taqiq qoʻyilishi mumkin.
Shu bois, Agentlik tomonidan xizmat koʻrsatish shartnomasi qayta koʻrib chiqilgan boʻlsa-da, fuqarolardan ish joyini oʻzgartirishda Koreya Respublikasi qonunchiligida belgilangan tartib va muddatlarga qatʼiy rioya qilish soʻraladi.
