Ferrari kompaniyasi AQSH Patent va savdo belgilari idorasiga ikkita alohida kokpit va ikkita rul mexanizmiga ega gʻayrioddiy avtomobil konstruksiyasi uchun ariza topshirdi. Unga koʻra, haydovchi ham, yoʻlovchi ham avtomobilni boshqarish uchun oʻzining toʻlaqonli oʻrindigʻiga ega boʻladi.
Bunda ikkala ruldan bir vaqtning oʻzida foydalanib boʻlmaydi. Ishlatilmayotgan rul mexanizmi taxminan 90 darajaga yigʻilib, yoʻlovchi oldidagi joyni boʻshatishi mumkin. Shunday qilib, vaziyatga qarab, avtomobilni u yoki bu tomondan boshqarish imkoniyati paydo boʻladi.
Rul chambaraklari zamonaviy Formula-1 bolidining shturvallari uslubida ishlangan va suriluvchi chambarak bilan jihozlangan. Bunday konstruksiya old gʻildiraklar bilan mexanik aloqaga ega boʻlmagan rul boshqaruvi tizimi qoʻllanilganidan dalolat berishi mumkin.
Ferrari bunday tizimni qoʻllashning bir nechta variantini koʻrib chiqmoqda. Masalan, kontinental Yevropadan Buyuk Britaniyaga sayohat qilayotganda, haydovchi avtomobilni qayta sozlamasdan boshqaruv tomonini tezda oʻzgartira oladi. Poyga sharoitida esa poygachining markazda yoki yon tomonda joylashuvi oʻng yoki chap burilishlar koʻp boʻlgan trassalardan oʻtish uchun qulayroq pozitsiyani tanlash imkonini beradi.
Yana bir ssenariy - uzoq muddatli sayohatlar. Ikkita toʻlaqonli boshqaruv oʻrindigʻi haydovchi va yoʻlovchiga toʻxtamasdan va joy almashtirmasdan, navbatma-navbat avtomobilni boshqarish imkoniyatini taqdim etadi.
