«Old Trafford»ga borgan oʻzbekistonlik va Istanbuldagi gʻalati isteʼfo. Kun oʻyinlari
|12:024 34912 min
«MU» 4 ta, «Bavariya» 5 ta gol urdi, «Komo» muxlislarning yoqimtoy jamoasi boʻlishda davom etmoqda.
Mateus Kunya «Saboh» darvozasiga birinchi golni urgan vaziyat. Foto: ReutersMateus Kunya «Saboh» darvozasiga birinchi golni urgan vaziyat. Foto: Reuters
Kun dramasi Pragada boʻlib oʻtdi: «Slaviya» «Lans»ga qarshi oʻyinda ozchilik boʻlib qolganiga qaramay, oʻyin oxirida oldinga chiqib olgandi, ammo qoʻshimcha daqiqalarda ikkita gol oʻtkazib yubordi.
«Fenerbahche» bosh murabbiyi esa «Roma» bilan durangdan keyin muxlislarning tanqidlari tufayli hissiyotga berilib, isteʼfo berdi: futbolchilar hayron, klub prezidenti uning qaytishini kutmoqda.
«Manchester Yunayted» «Saboh»ni osonlik bilan taslim etdi – 4:0. Turnir debyutanti deyarli qarshilik koʻrsatmadi va oʻyin taqdiri birinchi boʻlimdayoq hal boʻldi.
«Saboh» 27 daqiqa chidab berdi, keyin esa saviyadagi farq oʻzini koʻrsatdi. Qozogʻistonlik darvozabon Stas Pokatilov Mateus Kunya, Brunu Fernandesh va Benyamin Sheshkodan bittadan gol oʻtkazdi. Uning ikkinchi boʻlimda oʻtkazgan goli esa memlarga sabab boʻldi: jarima maydonidagi tartibsizlik vaqtida toʻp unga kelib tushdi, ammo darvozabon toʻpni yoʻqotib qoʻydi va Lisandro Martines bir metr masofadan turib, darvozani ishgʻol etdi. Bu vaqtda esa Joshua Zirkzeye allaqachon vaziyat qoʻldan boy berilgan deb hisoblab, afsus chekayotgandi.
Shu kuni «Saboh»ning boshlangʻich tarkibida 11 mamlakat vakillari, jumladan, oʻzbekistonlik Umarali Rahmonaliyev joy olgandi (u oʻyinda jamoadoshlaridan alohida ajralib turmadi va ikkinchi boʻlimda almashtirildi). Bu YECHL tarixida turnirdagi debyut oʻyin uchun birinchi shunday holat boʻldi. Tarkibdagi yagona ozarboyjonlik – markaziy himoyachi Rahmon Dashdamirov edi. «MU»da ham shu kuni boshlangʻich tarkibda yagona angliyalik futbolchi – Maynu tushgandi.
«MU» Chempionlar ligasidagi 300-oʻyinini oʻtkazdi va bu dovondan oʻtgan birinchi ingliz klubiga aylandi.
Mavzuga oid
Bu «Yunayted» uchun YECHL guruh bosqichlaridagi soʻnggi sakkiz oʻyinda atigi ikkinchi gʻalaba boʻldi. Bu oraliqda «qizil iblislar» ikki bor durang oʻynagan, toʻrt marta yutqazgan va 2023-yilda «Kopenhagen» bilan oʻyinda minimal gʻalabaga (1:0) erishgandi.
Keyingi turda «MU»ni «Atletiko» maydonida qiyin oʻyin kutmoqda, «Saboh» esa uyda «Slaviya»ni qabul qiladi.
«Bavariya» «Budyo-Glimt»ni ikkinchi boʻlimda taslim qildi – 5:0. Mehmonlar darvozaboni Nikita Xaykin jarohat olishi oʻyindagi burilish nuqtasiga aylandi.
Birinchi boʻlimda Xaykin jami beshta seyv amalga oshirgan, xususan, Luis Diasning boshda yaqin masofadan yoʻllagan zarbasi hamda Jamol Musialaning olis masofadan yoʻllagan zarbasini qaytargandi. Yozua Kimmihning zarbasidan keyin esa toʻp darvoza ustunini titratdi. Birinchi boʻlim oxirida norvegiyaliklar klubi darvozaboni original seyv ijro etdi. Xaykin Kimmihning navbatdagi zarbasidan keyin toʻpni darvoza chizigʻi ustida oyoqlari orasida qisib qolib toʻxtatdi. Lekin rossiyalik darvozabon aynan shu epizodda jarohatlandi va ikkinchi boʻlimga tushmadi.
Tanaffusdan keyin «Budyo» sochilib ketdi. Xaykin oʻrniga darvozada turgan Yulian Faye Lunn beshta gol oʻtkazib yubordi. 47-daqiqadayoq Musiala hisobni ochdi. Keyin esa nemis mashinasi ishga tushdi: Harri Keyn Maykl Olisening uzatmasidan keyin toʻpni bosh bilan darvozaga mixladi, keyin esa Alfonso Devis qaytarib boʻlmas zarbasi bilan hisobni yiriklashtirdi. Qolgan daqiqalarda esa Olise jarima maydoni tashqarisidan yoʻllagan zarbalari bilan raqibni uzil-kesil taslim etdi – 5:0.
«Bavariya» Chempionlar ligasida 900 gollik dovondan oʻtgan ikkinchi klubga aylandi. Endi myunxenliklarning asosiy yevrokubokda urgan gollari soni 904 ta. Oldinda faqat «Real» 1139 gol bilan joylashgan.
Keyingi turda ham Germaniya va Norvegiya jamoalari duellari kutmoqda: «Bavariya» safarda «Viking» bilan oʻynaydi, «Budyo» «Borussiya»ni qabul qiladi.
«Komo» – Chempionlar ligasining yana bir debyutanti. Sesk Fabregas shogirdlari Italiyaning birinchi turda gʻolib boʻlgan yagona jamoasi boʻldi. «Komo»ning YeChLdagi ilk goliga jamoaning xorvatiyalik yarimhimoyachisi Martin Baturina mualliflik qildi, boʻlim oxirida jamoaning gretsiyalik hujumchisi Anastasios Duvikas darvozabon bilan yakkama-yakka vaziyatga chiqib borib, hisobni mustahkamladi. Ikkinchi boʻlimda Assane Diao va Maksimo Perrone ham oʻz nomiga bittadan gol yozdirib qoʻyishdi. «Leypsig» esa Andriy Maksimovichning birgina goli bilan javob qaytardi. A Seriya vakillari shu kuni juda yorqin oʻyin koʻrsatishdi va oʻziga yangi muxlislar orttirdi.
Keyingi turda ushbu ikki jamoa ham Eredivizya vakillariga qarshi oʻynaydi – «Komo» «Feyenoord» mehmoni boʻladi, «Leypsig» PSVni qabul qiladi.
Istanbulda Joze Mourinioning ikki sobiq jamoasi uchrashdi. Birinchi boʻlimda «Roma»ning qoʻli baland keldi, ikkinchisida – «Fenerbahche»ning. Brian Kristantening goliga ikkinchi boʻlim boshida «Fener»ning angliyalik himoyachisi Archi Braun javob qaytardi.
Turklar klubi gʻalabani ilib ketishi ham mumkin edi, ammo rimliklar darvozaboni Mile Svilar bir necha bor mehmonlarni qutqarib qoldi. Hisob 1:1 holatida darvozabon Vedat Murikining yaqin masofadan yoʻllagan zarbasini oyoqlari bilan qaytarib qoldi, oʻyin oxirida yana bir zarba darvoza toʻsiniga bordi. Rimliklar sobiq hujumchisi Romelu Lukakuning maydonga tushishi ham turklarga yordam bermadi.
Oʻyindan keyin esa kutilmagan voqea roʻy berdi: «Fenerbahche» ustozi Ismoil Kartal matbuot anjumanida kutilmaganda oʻz isteʼfosini eʼlon qidi. Manbalarga koʻra, klub muxlislaridan biri murabbiyga qarata butilka uloqtirgan va Kartal hissiyotga berilib, qaror qabul qilgan. Istanbulliklar jamoasi ichki chempionat startidagi toʻrt oʻyindan ikkitasida yutqazgach, muxlislar va jurnalistlar tomonidan yopirilgan tanqidlar uni bezdirib yuborgandi.
Shundan keyin istanbulliklar klubi mikst-zonasida gʻaroyib voqealar boʻldi: klub prezidenti darhol ushbu isteʼfo haqida eshitishni istamasligini aytdi va Kartalni jamoa bilan keyingi mashgʻulotlarda kutishini bildirdi.
Shuningdek, ushbu oʻyinda istanbulliklar ochko olishini taʼminlagan Archi Braun bilan intervyu internetda keng tarqalmoqda: unda jurnalist futbolchiga murabbiy isteʼfo berganini aytadi, futbolchi esa bu yangilikka ishonmagani va tarjimada xatolik boʻldi deb oʻylagani, hayron boʻlgancha vaziyatni aniqlashtirishga harakat qilayotganini koʻrish mumkin.
Keyingi turda «Roma» «Real»ni qabul qiladi, «Fenerbahche» «Aston Villa» mehmoni boʻladi.
Eyndhovenda boʻlib oʻtgan oʻyin ham Istanbuldagi kabi ssenariyda kechdi: birinchi boʻlim oxirida mehmonlar hisobni ochishdi, ikkinchi boʻlim boshida mezbonlar muvozanatni tikladi. Birinchi boʻlimga qoʻshib berilgan daqiqalarda Gleyker Mendosa chiroyli zarbasi bilan «Shaxtyor»ni hisobda oldinga olib chiqqandi, ammo hakamlar bu golni uzoq tekshirishdi.
Gap shundaki, ushbu golli hujum davomida maydon markazida niderlandlar himoyachisi Serdjino Dest toʻqnashuv oqibatida gazonda yotib qolgandi, ammo yakunda hakamlar bu yerda ukrainlar jamoasi vakili toʻpga birinchi boʻlib ulgurgan deb topishdi va golni hisoblashdi.
Dest shundan keyin katta ishtiyoq bilan harakat qildi va ikkinchi boʻlim boshida hujumga oʻtib, hisobni tenglashtiruvchi golni urdi. Mezbonlar koʻproq hujum qildi va koʻproq zarba berishdi (7 ga qarshi 9), ammo hisob oʻzgarmay qoldi. Istanbuldagidan farqli oʻlaroq, Niderlandiyada hech kim durangdan keyin isteʼfo berib yubormadi.
PSV keyingi turda safarda «Leypsig»ga qarshi oʻynaydi, «Shaxtyor» esa «Stemford Brij» oʻyingohida Gretsiyaning AEK klubini qabul qiladi.
Kunning eng dramatik bahsi Pragada boʻlib oʻtdi. «Slaviya» va «Lans» tanaffusga golsiz chiqib ketgandi. Ikkinchi boʻlim boshida esa barchasi qizib ketdi. Mezbonlar ustozi tanaffusda hal qiluvchi oʻzgartirishni amalga oshirdi. Jarohat olgan David Zima oʻrniga 20 yoshli debyutant Mikulash Konechni tushirildi. U esa bir necha daqiqa oʻtmasdan soʻnggi umid foli uchun maydondan chetlatildi.
«Slaviya» darhol hisobni ochdi – Daniel Shturm olis burchakni aniq nishonga oldi. 73-daqiqada esa mehmonlar yarimhimoyachisi Abdalla Sima muvozanatni tikladi, ammo oʻyinning asosiy vaqti yakunlanishi arafasida yana Shturm katta sahnaga chiqdi va dublni rasmiylashtirdi.
Moʻʼjiza roʻy berishi yaqin edi: chexlar bir boʻlim ozchilik boʻlib oʻynaganiga qaramay, gʻalaba qozonishi mumkin edi. Ammo «Lans» bunga rozi emasdi. 90+1-daqiqada Florin Toven boshda yoʻllagan zarbasi bilan muvozanatni tikladi. Va bu hali hammasi emasdi. 90+3-daqiqada Ruben Agilar mezbonlarni oʻz jarima maydoni yaqinida toʻp yoʻqotgani uchun jazoladi. «Lans» qoʻshimcha daqiqalarda 1:2 hisobini 3:2 koʻrinishiga oʻzgartirdi. «Slaviya» munosib kurash olib bordi, ammo yakunda ochkolarsiz qoldi. Bunday magʻlubiyat jamoaning ruhiy holatiga jiddiy zarba boʻlishi mumkin.
Keyingi turda «Lans» «Sporting»ni qabul qiladi, «Slaviya» esa «Saboh»ga qarshi oʻyin uchun Bokuga safar qiladi.
1-turdan keyin turnir jadvali. «Komo» – kuchli beshlikda
«PSJ», «Bavariya», «Barsa» va «MU» kabi jamoalar toʻplar nisbati evaziga peshqadamlik qilmoqda. Debyutant «Komo» ham ular qatorida.
