«Sukut saqlama» loyihasi bergan xabarda aytilishicha, jizzaxlik kelin 2025-yil oktabrda turmushga chiqqan va besh oylik qizi bor. 2026-yilning may oyida uning eri qamalib qoladi. Ayol qaynonasi va qaynopasi bilan erini koʻrish uchun birgalikda boradi. Uchrashuvda kelin eriga oila aʼzolari tomonidan unga bosim qilinayotgani, uning nomiga tilla buyumlarni nasiyaga olib, ularni garovga qoʻyishganini aytib beradi. 30-iyun kuni qamoqxonadan qaytishda qaynopalari kelinning pasporti, telefoni va farzandining tugʻilganlik haqidagi guvohnomasini olib qoʻyadi. 6-iyul kuni qaynonasi va qaynopasi ijaraga xonadon olib, kelinni oʻsha yerda tutqunlikda saqlay boshlaydi. Bu unga eriga kredit va tilla bilan bogʻliq holatlarni aytgani uchun «jazo» edi. Ayol ovqat va suvdan cheklanadi, bir kunda bir burda non berishadi.
Tarakan dorisi yedirilib, hojatxona suvi ichirilgan
«Ular ayolni muntazam ravishda kaltaklashar, boʻgʻishar, boshini devorga urib, qorni va bachadoniga tepishardi. Qaynopalardan biri kelinini doimiy ravishda qoʻriqlab turar, unga xonasidan chiqishga ruxsat bermasdi. Kelinni vaqti-vaqti bilan kaltaklashar, baʼzan bu ishlarni videoga olishardi va uni hamda oilasini oʻldirish bilan qoʻrqitishardi. Ruhiy kasalliklar shifoxonasidan maʼlumotnoma olganliklarini va ularga hech kim hech narsa qilolmasligini iddao qilishardi.
Zoʻrlik bilan ushlab turilganida kelinga bir boʻlak non berishardi va kuniga bir marta hojatxonaga chiqishga ruxsat berilardi. Ular tarakan dori yeyishga va hojatxona suvini ichishga majbur qilishardi. 27-avgust kuni Ruxshona ismli qaynopasi uni kaltaklab, barcha kiyimlarini yirtib, zargarlik buyumlarini buzib tashlab, ularni axlatga tashlashga majbur qilgan. Kameraga tushib qolmaslik uchun uni liftdan emas, zinapoyadan tushishga majbur qilgan», deyiladi xabarda.
29-avgust kuni qaynopa kelib kelinga «ustingga qaynoq suv quysam, kuyasanmi?» deb savol bergan. Ayol «ha» deb javob berganidan bir necha daqiqa oʻtib, uning ustiga qaynoq suv quygan. Keyin qaynoq suvga tuz va soda qoʻshib yana ayolni kuydirgan.
6-sentabr kuni ayol xonadondan chiqib ketish imkonini topgan. U uchinchi qavatdan yongʻin zinapoyasi orqali tushib, koʻchadagi odamlardan taksi chaqirishda yordam soʻragan va otasiga qoʻngʻiroq qilgan. Ular birgalikda shifoxonaga borgan. Ayol ogʻir ahvolda shifoxonaga yotqizilgan. Ammo unga nisbatan sud-tibbiy ekspertiza shifoxonadan chiqqanidan keyin oʻtkazilishini aytishgan. IIVning Xotin-qizlar masalalari boʻyicha boshqarmasi holat yuzasidan Jinoyat kodeksining 109- va 110-moddalari boʻyicha ish qoʻzgʻatilganini maʼlum qilgan. Ammo kelinning otasi bundan bexabar, hozirga qadar u bilan hech kim bogʻlanmaganini aytgan. U qiziga nisbatan zoʻravonlik qilganlar qonun doirasida eng ogʻir jazoga tortilishini talab qilmoqda.
