2028-yilgi UEFA Superkubogi oʻyini Qozogʻiston poytaxti Ostonadagi «Astana Arena» stadionida boʻlib oʻtadi. Bunday qarorni Yevropa futbol assotsiatsiyalari ittifoqi ijro qoʻmitasi 15-sentabr kuni Saloniki shahrida boʻlib oʻtgan yigʻilishda qabul qildi.
Qozogʻiston birinchi marta UEFA Superkubogi oʻyinini qabul qiladi, unda Chempionlar ligasi va Yevropa ligasi gʻoliblari toʻqnash keladi.
«Astana Arena» nufuzli oʻyinni oʻtkazish uchun maydon qoplamasi masalasini hal qilishi kerak: sunʼiy chimni tabiiy chimga almashtirish.
«Astana Arena» 2019-yilgi UEFA Superkubogini oʻtkazishga ham daʼvogarlik qilgan edi. UEFA arizalar boʻyicha hisobotida stadion sunʼiy qoplamaga ega ekanligi, Qozogʻiston tomoni esa uni tabiiy qoplama bilan almashtirish imkoniyatini oʻrganayotganini taʼkidlagan. Yakunda 2019-yilgi oʻyin Turkiyaning Istanbul shahrida boʻlib oʻtdi.
«Astana Arena» 2009-yilda ochilgan boʻlib, taxminan 30 ming tomoshabinga moʻljallangan. Bu yerda Qozogʻiston milliy jamoasi va poytaxtning «Astana» klubi oʻz uy oʻyinlarini oʻtkazadi. 2025-yilda stadionda keng koʻlamli rekonstruksiya ishlari yakunlandi, uning davomida, xususan, muhandislik tizimlari yangilandi va maydonning sunʼiy qoplamasi almashtirildi.
UEFA Superkubogining amaldagi sohibi Fransiyaning PSJ klubi hisoblanadi. Kubok uchun kechgan bahsda parijliklar Angliyaning «Aston Villa» jamoasini magʻlub etdi (2:1). Oʻyin 12-avgust kuni Avstriyaning Zalsburg shahrida boʻlib oʻtdi. 2027-yilda UEFA Superkubogi uchun oʻyin Amsterdamdagi «Yohan Kroyf Arena»da boʻlib oʻtadi.
