16-sentabrga oʻtar kechasi - tunda Gʻazo shahrida urushdan zarar koʻrgan 7 qavatli turar-joy binosi qulab tushdi. Oqibatida kamida 20 nafar falastinlik, jumladan, ayollar va bolalar halok boʻldi, oʻnlab odamlar esa vayronalar ostida qolib ketdi.
Mahalliy rasmiylarga tayanib Al Jazeera'ning yozishicha, halok boʻlgan 20 kishi orasida besh nafar bola ham boʻlgan, yana 14 kishi jarohatlangan.
Gʻazo fuqaro mudofaasi matbuot kotibi Mahmud Basal qutqaruvchilar hamon vayronalar ostidan jasadlarni olib chiqish va bedarak yoʻqolganlarni qidirish ustida ishlayotganini bildirdi. «Hozirga qadar ushbu bino vayronalari ostida 100 ga yaqin falastinlik qolmoqda», deydi u.
Boz ustiga, qutqaruv guruhlarida tegishli uskunalar yoʻqligi sababli odamlarga yetib borish oʻta qiyin kechmoqda.
Mahalliy OAVning xabar berishicha, bino avvalroq Isroil hujumlaridan zarar koʻrgan. Buning oqibatida u qulashidan oldin darz ketgan va konstruksiyasi zaiflashib qolgandi.
Reuters tomonidan olingan videoda qutqaruvchilarning qulab tushgan devor ostidan ikki kishini olib chiqishga urinayotgani aks etgan. Ijtimoiy tarmoqlardagi boshqa bir videoda qutqaruvchilar qonga belangan yosh bolani koʻtarib ketayotgani koʻrsatilgan.
Gʻazo shahri fuqaro mudofaasi xizmati rahbari Raid ad-Dahshanning Reutersʼga aytishicha, qulagan binoda kamida 10 ta oila yashagan va omon qolganlarni topish umidi hamon saqlanib qolmoqda.
Gʻazodagi hukumat ushbu hodisa uchun «Isroil okkupatsiyasi va xalqaro hamjamiyatni toʻliq va bevosita javobgar» deb hisoblashini maʼlum qildi.
