Toshkent shahri Yoʻl harakatini tashkil etish markazi mutaxassislari Maxtumquli koʻchasidagi transport oqimlarini tahlil qilib, svetoforlar ishini «yashil toʻlqin» tamoyili asosida muvofiqlashtirdi.
Markaz maʼlumotiga koʻra, harakat intensivligi, transport oqimining kun davomida taqsimlanishi, svetofor sikllari davomiyligi va chorrahalar oʻrtasidagi harakatlanish vaqti tahlil qilingan. Natijada koʻchadagi 11 ta svetofor obyektining ishlash tartibi oʻzaro muvofiqlashtirilgan.
Maxtumquli koʻchasida sutkalik oʻrtacha transport oqimi qariyb 90 mingta avtomobilni tashkil etadi.
«Yashil toʻlqin» tizimi transport oqimining asosiy yoʻnalishidan kelib chiqib, ikki rejimda ishlaydi. Soat 00:00 dan 13:00 gacha tizim Toshkent shahri markazi tomon - Maxtumquli va Yangi Oʻzbekiston koʻchalari kesishmasidagi uch darajali yoʻl oʻtkazgichdan Amir Temur xiyoboni yoʻnalishida sozlangan.
Soat 13:00 dan 00:00 gacha esa teskari - Amir Temur xiyobonidan Maxtumquli va Yangi Oʻzbekiston koʻchalari kesishmasidagi yoʻl oʻtkazgich tomon harakat ustuvor hisoblanadi.
Muvofiqlashtirilgan yoʻnalish boʻyicha hisoblangan harakat tezligi 55 km/soatni tashkil etadi. Shu tezlikda harakatlangan avtomobil keyingi chorrahalarda yashil chiroq yonadigan hisoblangan vaqt oraligʻiga ketma-ket tushishi koʻzda tutilgan.
Markaz hisob-kitoblariga koʻra, optimallashtirish natijasida yoʻnalishning oʻtkazuvchanlik qobiliyati 12 foizga oshgan, oʻrtacha harakatlanish vaqti esa 10 foizga qisqargan.
Qayd etilishicha, «yashil toʻlqin» yoʻnalish boʻylab barcha svetoforlarda uzluksiz yashil chiroq yonib turishini anglatmaydi. Tizimning vazifasi svetofor sikllarini matematik hisob-kitoblar asosida muvofiqlashtirib, avtomobillarning toʻxtashlari va chorrahalarda kutish vaqtini kamaytirishdan iborat.
Ayni paytda haqiqiy harakatlanish vaqti transport oqimi zichligi, haydovchilarning tezlikka rioya qilishi, jamoat transporti va piyodalar harakati, YTH, taʼmirlash ishlari hamda yoʻldagi boshqa holatlarga qarab oʻzgarishi mumkin.
Yoʻl harakatini tashkil etish markazi Toshkentning boshqa hududlarida ham transport oqimlarini tahlil qilish va svetoforlar ishini oʻzaro muvofiqlashtirish ishlari davom ettirilayotganini maʼlum qildi.
