Rossiyada 18-sentabr, juma kuni soat 08:00 dan Davlat dumasiga saylovlar rasman boshlandi. Mamlakat hududlari oʻrtasidagi vaqt farqi sabab birinchi boʻlib Kamchatka va Chukotkadagi saylov uchastkalari ochildi.
Ovoz berish uch kun - 18, 19 va 20-sentabr kunlari oʻtkaziladi. Hududlarda saylov uchastkalari mahalliy vaqt bilan soat 20:00 gacha ishlaydi.
Davlat dumasining yangi chaqiriqdagi 450 deputati aralash saylov tizimi asosida saylanadi. Ularning yarmi - 225 deputat bir mandatli saylov okruglarida, yaʼni saylovchilar muayyan nomzodga ovoz berish orqali saylanadi. Qolgan 225 oʻrin partiyalar roʻyxati boʻyicha ovoz berish natijalari asosida taqsimlanadi.
DW maʼlumotiga koʻra, partiya roʻyxati boʻyicha saylovda 10 ta partiya ishtirok etmoqda. «Yabloko» partiyasi esa avvalroq rasmiy sabablar bilan partiyaviy roʻyxat boʻyicha saylovdan chetlatilgan. Shu bilan birga, partiyaning ayrim vakillari bir qator hududlarda bir mandatli okruglardan nomzod sifatida qatnashmoqda.
Ukrainaning Rossiya nazoratidagi hududlarida ham ovoz berish oʻtkazildi
Rossiyada avvalgi Davlat dumasi saylovlari 2021-yilda oʻtkazilgan edi. 2026-yilgi saylov jarayoni doirasida Rossiya Ukrainaning oʻzi nazorat qilayotgan hududlarida ham ovoz berishni tashkil etdi. Ukraina va xalqaro hamjamiyatning katta qismi bu hududlarni Rossiya tarkibi sifatida tan olmaydi.
Rossiyaning Ukrainaga qarshi urushida qatnashgan harbiylar, shuningdek, Rossiya nazoratidagi Ukraina hududlarida yashovchilar uchun muddatidan oldin ovoz berish avgust oyi oxiridan 17-sentabrga qadar oʻtkazilgani Rossiya rasmiy tuzilmalari tomonidan maʼlum qilindi.
DW keltirgan kuzatuvchilar fikricha, mazkur hududlardagi ovoz berish natijalarini mustaqil ravishda tekshirish imkoniyatlari cheklangan. Xususan, hududiy saylov komissiyalari aʼzolari haqidagi maʼlumotlar va ayrim saylov uchastkalari manzillari ochiq eʼlon qilinmagani, ochiq videokuzatuv tashkil etilmagani qayd etilgan.
Shuningdek, koʻchma saylov qutilaridan foydalanishga ruxsat berilgan. Rossiya Markaziy saylov komissiyasi mahalliy komissiyalarga zarurat tugʻilganda byulletenlarni joyida chop etish hamda ovozlar sanab boʻlingach, ularni darhol yuqori turuvchi saylov organlariga topshirmaslik imkonini bergani ham maqolada keltirilgan.
