20-sentabr kuni Germaniya poytaxti Berlin hamda Meklenburg – Old Pomeraniya yerida federal saylovlar boʻlib oʻtdi. Kansler Fridrix Mers rahbarligidagi Xristian-demokratik ittifoq (XDI) uchun ikkala saylov ham magʻlubiyat bilan yakunlandi: Berlinda Deputatlar palatasi uchun ovoz berishda «Soʻl partiya» (Die Linke) gʻalabani qoʻlga kiritdi, Meklenburgda esa region parlamenti (landtag) uchun saylovda oʻta oʻng hisoblangan «Germaniya uchun muqobil» (AfD) partiyasi birinchi oʻrinni egalladi. Ikkala partiya ham oldingi saylovlarda koʻrsatgan natijasini ikki baravarga yaxshilagan.
Dastlabki maʼlumotlarga koʻra, «Soʻl partiya» Berlinda jami ovozlarning 25,7 foizini oʻziniki qilgan – bu 2023-yilda boʻlib oʻtgan oldingi saylovlar bilan solishtirganda 13,5 foiz punktga yaxshiroq. Oldingi saylovlar gʻolibi boʻlgan XDI esa bu safar 18,8 foiz ovoz bilan kifoyalangan (9,4 foiz punkt pasayish), keyingi oʻrinlarda AfD (16,3 foiz), «Yashillar» (14,3 foiz) va Germaniya sotsial-demokratik partiyasi (12,1 foiz) joylashgan. Qolgan partiyalar, jumladan, «Sara Vagenknext ittifoqi» (BSW) partiyasi ham 5 foizlik chegaradan oʻta olmagan. Saylovda davomat 74 foizdan oshgan.
«Soʻllar» uchun bu Berlindagi saylovlar tarixidagi eng yuqori natija. Soʻnggi yillardagi rebrending va tarkib jiddiy oʻzgartirilishi partiyaning muvaffaqiyatini taʼminladi. Partiyadagi rahbarlik lavozimlarini yosh siyosatchilar, jumladan, ayollar egalladi va ularning koʻpchiligi «Germaniya uchun muqobil» partiyasiga murosasiz pozitsiyani egallaydi.
«Soʻllar» oʻz saylovoldi kun tartibini berlinliklar uchun eng dolzarb va ogʻriqli boʻlgan uy-joy mavzusi atrofida qurishgan. Partiya saylovlarga allaqachon shaharga tegishli boʻlgan xonadonlarda ijara haqini cheklash va yirik xususiy ijaraga beruvchilarning 220 mingga yaqin kvartiralarini jamoat mulkiga oʻtkazishga erishish vaʼdasi bilan kirishdi. Partiyadagi ichki islohotlar hamda tanlangan kun tartibi bir yil ichida tarafdorlar sonini ikki baravarga oshirishga yordam berdi: 2025-yil oxiriga kelib partiyaga aʼzolar soni 123 ming kishini tashkil etayotgandi.
Gʻalabadan keyin Berlin shahri merligini «Soʻllar» yetakchisi – 45 yoshli Elif Eralp egallashi kerak, Financial Times nashri uni «Berlinning Mamdaniyga javobi» deb taʼriflagan. Eralp – 1980-yilgi davlat toʻntarishidan keyin Turkiyani tark etgan muhojirlar farzandi hisoblanadi. U Berlinning muhojirlardan chiqqan ilk meriga aylanishi mumkin.
Meklenburg – Old Pomeraniyada esa «Germaniya uchun muqobil» partiyasi 38,2 foiz ovoz olgan – bu 2021-yilgi saylovlarga qaraganda ikki baravar yaxshiroq natija. Bungacha ushbu hududda rahbarlik qilgan sotsial-demokratlar esa 35,5 foiz bilan ikkinchi boʻlgan. Shuningdek, «Soʻllar» 6,5 foiz, «Yashillar» 5,7 foiz ovoz bilan landtagga kirgan.
