«Novaya gazeta» hammuassisi va sobiq bosh muharriri Dmitriy Muratov AQSH prezidenti Donald Trampning maxsus vakili Stiven Uitkoff hamda prezident kuyovi Jared Kushnerga murojaat qildi.
Muratov ularni Rossiya prezidenti Vladimir Putin bilan oʻtkaziladigan muzokaralarda rossiyalik siyosiy mahbuslarni ozod qilish masalasini koʻtarishga chaqirdi.
Nobel mukofoti sovrindori bu taklifni 19-sentabr kuni CNN telekanali efirida bildirgan. Uning fikricha, inson huquqlariga rioya etilishi va keng koʻlamli xalqaro toʻqnashuv xavfi bir-biri bilan bevosita bogʻliq.
Muratov Uitkoff Kremldagi navbatdagi uchrashuvdan keyin AQShga qaytayotganda ozod qilingan bir necha mahbusni samolyotida olib ketishi mumkinligini aytdi.
«Nega u yaxshi munosabatlarga ega boʻlgan janob Putindan bir nechta siyosiy mahbusni ozod qilishni soʻray olmaydi?» - dedi u.
Muratovning taʼkidlashicha, Uitkoffning samolyoti Moskvadagi muzokaralardan keyin odatda yoʻlovchilarsiz AQShga qaytadi. Jurnalist Amerika vakillari diplomatik aloqalaridan insonlarni ozod qilish uchun ham foydalanishi kerak, deb hisoblaydi.
Belarusda 25 nafar mahbus ozod qilindi
Muratov misol sifatida AQShning maxsus vakili Jon Koulning Belarus rahbari Aleksandr Lukashenko bilan olib borayotgan muzokaralarini keltirdi.
Koul bilan 16-sentabr kuni oʻtkazilgan navbatdagi uchrashuvdan keyin Belarus koloniyalaridan yana 25 nafar siyosiy mahbus ozod qilingan. Buning evaziga AQSH Belarusning ikki korxonasiga nisbatan joriy etilgan sanksiyalarni bekor qilgan.
Muratovning fikricha, mahbuslarni ozod qilish boʻyicha shunga oʻxshash muzokaralarni Rossiya bilan ham olib borish mumkin.
Uitkoff Moskvaga sakkiz marta borgan
Stiven Uitkoff va Jared Kushner oxirgi marta 5-sentabr kuni Kremlda Vladimir Putin bilan uchrashgan edi. Bu Uitkoffning Ukrainadagi urushni tugatish imkoniyatlarini muhokama qilish uchun Moskvaga sakkizinchi tashrifi boʻldi.
Ertasi kuni Amerika vakillari Polsha orqali poyezdda Kiyevga borib, Ukraina prezidenti Volodimir Zelenskiy bilan muzokara oʻtkazdi. Keyinchalik ular Polsha orqali AQShga qaytdi.
