DW nashri TV Moldova telekanali maʼlumotlariga tayanib xabar berishicha, parlament tegishli qarorni 22-sentabr kuni qabul qilgan. Favqulodda choralarni 54 deputat qoʻllab-quvvatlagan, 20 nafari qarshi chiqqan. Yana 22 deputat ovoz berishda qatnashmagan.
Moldova bosh vaziri Vasile Tofanning tushuntirishicha, mamlakat bir qator omillar taʼsirida energiya va suv taʼminoti inqirozi xavfiga duch kelgan. Ular orasida Eron va Ukrainadagi urushlar, shuningdek, gidroelektrostansiyalar ishiga taʼsir koʻrsatgan qurgʻoqchilik ham bor.
Gaz va yonilgʻi narxlarining koʻtarilishi bilan birga, Dnestr daryosida suv sathining pasayib borayotgani ham favqulodda choralar koʻrishga sabab boʻlgan.
Hukumatga tezkor chora koʻrish imkoniyati beriladi
Qaror qabul qilinishidan bir kun avval Moldova prezidenti Mayya Sandu Milliy xavfsizlik kengashi yigʻilishi yakunlari haqida maʼlum qilgan edi.
Uning aytishicha, kengash parlament, hukumat va masʼul idoralar bilan kelishilgan holda energetika va suv xoʻjaligi sohalarida favqulodda holat joriy etishni tavsiya qilgan. Bu hukumatga favqulodda vaziyatlarga tezkor javob berish uchun zarur choralarni qoʻllash imkonini berishi kerak.
Sandu Moldovaning energiya resurslari importiga bogʻliqligini taʼkidlagan. Shuningdek, jahonda benzin va dizel yonilgʻisi narxlari misli koʻrilmagan darajada yuqori ekaniga eʼtibor qaratgan.
Mamlakatda avval ham favqulodda rejim amal qilgan
Maqolada qayd etilishicha, Moldovaning energetika va suv xoʻjaligi sohalarida 28-iyuldan buyon hukumat eʼlon qilgan yuqori tayyorgarlik rejimi amal qilmoqda.
Bundan avval, mart oyida ham energetika sohasida 60 kunlik favqulodda holat joriy etilgan. Oʻshanda bunday chora mamlakat elektr taʼminotida muhim oʻrin tutuvchi Isakcha - Vulkaneshti elektr uzatish liniyasi uzilishi bilan bogʻliq boʻlgan.
