«Manchester Siti» Angliya Premyer-ligasining (APL) moliyaviy qoidalarini buzganlikda aybdor deb topildi. Bu haqda The Athletic (The New York Times sport boʻlimi) xabar berdi.
Klub 115 ta ayblov punktidan 114 tasi boʻyicha aybdor deb topildi, deb xabar berdi nashrga anonimlik sharti bilan manbalar (chunki ular ommaviy bayonot berish vakolatiga ega emas edi).
Taʼkidlanishicha, jazo choralari hali aniqlanmagan - barcha variantlar koʻrib chiqilmoqda va «Manchester Siti» apellyatsiya berishi kutilmoqda.
«Jarayon davom etmoqda, muhim bosqichlar yakunlanishi kerak, ishning borishi esa qatʼiy maxfiyligicha qolmoqda. Shu munosabat bilan «Manchester Siti»ning pozitsiyasi oʻzgarishsiz qolmoqda va klubning 2023-yil fevral oyidagi bayonotiga mos keladi. Klub sakkiz yil davomida APL rahbariyati va ijro organlari mustaqil, xolis va adolatli, noxolis taʼsirdan xoli regulyator sifatida faoliyat yuritishiga ishonib, belgilangan tartib-qoidalarga vijdonan rioya qildi», - dedi «Manchester Siti» vakili.
APL 2023-yil boshida 2018-yilda boshlangan tergov natijasida, klub 2008-yilda City Football Group tomonidan sotib olinganidan keyin yuzdan ortiq qoidabuzarliklarni aniqlaganini maʼlum qildi. Liganing daʼvolari noaniq moliyaviy maʼlumotlarni taqdim etish, tergov bilan hamkorlik qilishdan bosh tortish, 2009–2013-yillarda jamoani Roberto Manchini boshqargan vaqtda murabbiylarning maoshini toʻliq oshkor qilmaslik hamda 2013–2018-yillarda fair play qoidalari va moliyaviy barqarorlikka rioya qilmaslik bilan bogʻliq. «Manchester Siti» barcha ayblovlarni rad etib kelgan.
2024-yil avgust oyida New York Times «Manchester Siti» 70–80 ochkodan mahrum boʻlishi mumkinligi, bu esa Premyer-Ligadan quyi ligaga tushib ketishni kafolatlashi haqida yozgan edi.
