Pasport yoki ID-karta yoʻqolganda nima qilish kerak?

2026-yil 1-sentabrdan boshlab bazaviy hisoblash miqdori 440 000 soʻmni tashkil etadi.

● Arizani my.gov.uz orqali topshirganda - 352 440 soʻm (BHMning 0,801 baravari).

● Davlat xizmatlari markaziga bevosita murojaat qilinganda - 391 600 soʻm (BHMning 89 foizi).

Rasmiylashtirish muddati - biometrik maʼlumotlar topshirilgan va zarur hujjatlar toʻliq qabul qilinganidan keyin bir ish kuni. Shuning uchun muddatni my.gov.uz orqali ariza berilgan paytdan boshlab hisoblash kerak emas.

ID-kartani rasmiylashtirish tartibi Vazirlar Mahkamasining 2022-yil 6-yanvardagi 8-son qarori bilan belgilangan.

Pasport yoki ID-karta oʻgʻirlansa nima qilish kerak?

Agar pasport yoki ID-karta oʻgʻirlansa, jinoyat sodir etilgan joy yoki yashash joyi boʻyicha hududiy ichki ishlar organining navbatchilik qismiga murojaat qilish kerak. Ariza qabul qilinganidan soʻng maʼlumotnoma beriladi.

Maʼlumotnomani saqlab qoʻyish kerak. U oʻgʻrilik faktini tasdiqlaydi va maʼmuriy jarima masalasini hal qilishda kerak boʻladi: agar hujjat jinoyat natijasida oʻgʻirlangan boʻlsa, jarimadan ozod qilinadi.

Ichki ishlar organlariga murojaat qilgandan soʻng yangi hujjatni rasmiylashtirish mumkin.

Qanday jarimalar belgilangan?

Pasport, ID-karta yoki xorijga chiqish uchun biometrik pasport (xorijiy pasport) yoʻqotilgani yoki yaroqsiz holga keltirilgani uchun 1 BHM miqdorida jarima belgilangan, qoidabuzarlik bir yil davomida takror sodir etilsa - 5 BHM miqdorida jarima solinadi.

Pasport yoki ID-kartasiz, shu jumladan amal qilish muddati tugagan hujjat bilan yashaganlik uchun ham alohida jarima belgilangan: birinchi qoidabuzarlik uchun 0,5 BHM, bir yil davomida takror sodir etilganda esa 3 BHM miqdorida jarima.

ID-kartaning amal qilish muddati tugaganidan soʻng bir oy ichida yangi ID-karta olish uchun murojaat qilish kerak. Yoʻqotilgan taqdirda alohida muddat belgilanmagan, yoʻqotilgani haqida imkon qadar tezroq xabar berish kerak, yangi ID-karta esa biometrik maʼlumotlar topshirilgan va zarur hujjatlar toʻliq qabul qilinganidan keyin bir ish kuni ichida rasmiylashtiriladi.

Ayrim hollarda jarima qoʻllanmaydi. Masalan, hujjatni 18 yoshga toʻlmagan yoki 60 yoshdan oshgan shaxs yoʻqotgan boʻlsa, favqulodda vaziyatdan jabrlangan boʻlsa yoki hujjat oʻgʻirlangan boʻlsa. Oʻgʻrilik holatida ichki ishlar organlaridan berilgan maʼlumotnoma kerak boʻladi.

Agar jarima belgilangan boʻlsa, uni chegirma bilan toʻlash mumkin: qarorni olganidan keyin 15 kun ichida 50 foizini yoki 30 kun ichida 70 foizini. Qolgan qismini toʻlash talab etilmaydi. Chegirma qaror ustidan shikoyat qilinganda va bir yil ichida xuddi shunday qoidabuzarlik takroran sodir etilganda qoʻllanmaydi.

Oʻz nomiga kredit rasmiylashtirishni qanday taqiqlash mumkin?

Pasport yoki ID-karta yoʻqolganidan soʻng my.gov.uz orqali kredit shartnomasini tuzishga taqiq oʻrnatish mumkin. Taqiq oʻrnatilgandan soʻng banklar va boshqa moliyaviy tashkilotlar sizning nomingizga kredit rasmiylashtira olmaydi.

Oʻz nomiga kredit rasmiylashtirishni qanday taqiqlash mumkinligi haqida batafsil - ushbu maqolada.

Xorijga chiqish pasporti yoʻqolsa, nima qilish kerak?

Agar xorijga chiqish pasportini yoʻqotgan boʻlsangiz, uni almashtirish uchun my.gov.uz orqali ariza berish yoki Davlat xizmatlari markaziga murojaat qilish kerak.

Rasmiylashtirish muddati - 10 ish kunigacha. 16 yoshdan 25 yoshgacha boʻlgan fuqarolar uchun qoʻshimcha oʻrganishni talab qiladigan istisno holatlarda muddat bir oygacha boʻlishi mumkin.

Portal orqali ariza berishda anketani toʻldirgandan soʻng tanlangan pasport stoliga borish kerak boʻladi. U yerda hujjatlar tekshiriladi, barmoq izlari olinadi va suratga tushiriladi. Rasmiylashtirish tartibi, zarur hujjatlar va narxi haqida batafsil maʼlumot - ushbu maqolada.

Pasport chet elda yoʻqolsa, nima qilish kerak?

Agar Oʻzbekiston fuqarosi xorijda yurganida pasportini yoʻqotsa yoki unga shikast yetsa, Oʻzbekistonning konsullik muassasasiga murojaat qilishi kerak. Mamlakatga qaytish uchun Oʻzbekiston Respublikasiga qaytish guvohnomasi rasmiylashtiriladi. Guvohnoma bir oydan uch oygacha amal qiladi.

Arizani konsullik tizimi orqali rasmiylashtirish mumkin: roʻyxatdan oʻtish kartochkasini toʻldirish, shaxsiy maʼlumotlarni, yoʻqolgan pasport haqidagi maʼlumotlarni, murojaat qilish sababini va Oʻzbekistondagi manzilni koʻrsatish kerak.

Pasport yoʻqolgan yoki oʻgʻirlangan taqdirda, boʻlib turgan mamlakatning vakolatli organlari tomonidan berilgan, hujjat yoʻqolgani yoki oʻgʻirlanganini tasdiqlovchi hujjat talab etiladi.

Guvohnoma tayyorligi haqida xabarnoma olinganidan soʻng konsullik qabuliga yozilish va hujjatlarning asl nusxalari hamda nusxalari, uch nusxada elektron anketa va 3,5 × 4,5 sm oʻlchamdagi ikkita rangli fotosurat bilan kelish kerak.

Oʻzbekistonga qaytgandan soʻng guvohnomani yangi pasport rasmiylashtirish uchun oʻn kun ichida yashash joyi boʻyicha ichki ishlar organlariga topshirish kerak.

Xulosa

● Eski biometrik pasport yoʻqolganida yangi ID-karta rasmiylashtiriladi. ID-karta yoʻqolganida esa uning oʻrniga yangi ID-karta beriladi.

● ID-karta olish uchun arizani my.gov.uz orqali topshirish mumkin, ammo biometrik maʼlumotlarni topshirish uchun shaxsan borish talab etiladi.

● Ariza portal orqali topshirilganda xizmat narxi 352 440 soʻm, Davlat xizmatlari markaziga murojaat qilinganda esa 391 600 soʻmni tashkil etadi. Rasmiylashtirish muddati biometrik maʼlumotlar topshirilib, hujjatlar toʻliq qabul qilinganidan keyin bir ish kunini tashkil etadi.

● Pasport, ID-karta yoki xorijga chiqish pasporti yoʻqolgani yoki yaroqsiz holga kelgani uchun 1 BHM miqdorida jarima belgilangan. Ayrim hollarda, jumladan hujjat jinoyat natijasida yoʻqolgan boʻlsa, jarima qoʻllanmaydi.

● Hujjat oʻgʻirlangan boʻlsa, ichki ishlar organlariga murojaat qilish va bu haqda berilgan maʼlumotnomani saqlab qoʻyish kerak.

● Agar pasport xorijda yoʻqolgan boʻlsa, Oʻzbekistonning konsullik muassasasiga murojaat qilish va Oʻzbekistonga qaytish guvohnomasini rasmiylashtirish kerak.