Naked Science xabariga koʻra, RTX tarkibiga kiruvchi Pratt & Whitney kompaniyasi GTF Advantage turboventilyatorli dvigateli foydalanishga kiritilganini eʼlon qilgan. Yangi versiyani joriy etish Airbus A320neo oilasi samolyotlarining samaradorligini oshirishi kutilmoqda.
Airbus A321XLR - 8 700 kilometrgacha masofani bosib oʻta oladigan tor fyuzelyajli uzoq masofaga uchuvchi layner. U avval bunday turdagi samolyotlar bilan xizmat koʻrsatish qiyin boʻlgan yoʻnalishlarda parvozlarni amalga oshirish uchun yaratilgan.
RTX maʼlumotiga koʻra, GTF Advantage A321XLRʼning ishonchliligini oshirish, tortish kuchini koʻpaytirish va yanada uzoq masofali reyslarni bajarish imkoniyatini kengaytirishga xizmat qiladi. Biroq yangi dvigatel bilan parvoz masofasi qanchaga oshishi haqida aniq koʻrsatkich keltirilmagan.
Taʼmirgacha ishlash muddati uzaytirilgan
Yangi dvigatelning asosiy xususiyatlaridan biri - chidamliligi oshirilgani. Ishlab chiqaruvchining taʼkidlashicha, uning texnik xizmat koʻrsatishgacha ishlash muddati amaldagi versiyaga nisbatan ikki baravargacha koʻp boʻlishi mumkin.
Shuningdek, GTF Advantageʼning yuqori haroratda ishlaydigan qismlari takomillashtirilgan. Kompaniya uni tor fyuzelyajli samolyotlar dvigatellari orasidagi eng ilgʻor «issiq qism» deb taʼriflamoqda.
Konstruksiyadagi oʻzgarishlarga qaramay, GTF Advantage mavjud GTF versiyasi bilan moslikni saqlab qolgan. Bu har ikki turdagi dvigatel oʻrnatilgan samolyotlardan foydalanuvchi aviakompaniyalar uchun ekspluatatsiyani yengillashtirishi mumkin.
