AQSH prezidenti Donald Tramp siyosiy mahbuslarni ozod qilish evaziga Rossiyaga qarshi sanksiyalarni yumshatish gʻoyasini maʼqulladi, deb yozdi The Atlantic.
Jurnalist Saymon Shusterning soʻzlariga koʻra, bunday sxemani maxsus vakil Jon Koul taklif qilgan. U Belarusda sanksiyalarni yumshatish evaziga 500 ga yaqin siyosiy mahbusni ozod qilishga erishgan.
Shu bilan birga, Vashington va Minsk Belarus kaliysini sotib olish boʻyicha yirik kelishuvni muhokama qilmoqda, bu haqda AQSH prezidenti oʻtgan hafta maʼlum qilgandi. Koulning soʻzlariga koʻra, bu muzokaralarda Rossiya ham ishtirok etmoqda - Yevropa sanksiyalari tufayli Belarus kaliysini Rossiya hududi orqali olib chiqishga toʻgʻri keladi.
Koulning Moskvaga nisbatan rejasi dastlabki bosqichda boʻlib, Rossiya va AQSH oʻrtasidagi muzokaralardagi boshi berk koʻchadan chiqishga qaratilgan, deb yozdi Shuster. Jurnalistning fikricha, Vladimir Putinda Ukrainaga zarba berishni toʻxtatmasdan turib, amerikaliklar bilan munosabatlarda yaxshi niyat va diplomatik taraqqiyot belgilarini koʻrsatishning oddiy usuli paydo boʻladi. Mahbuslarni ozod qilish evaziga Vashington Kremlga sanksiyalarni yumshatish va savdo kelishuvlariga qaytishni taklif qilishi mumkin.
Koulning fikricha, bunday kelishuvlar tinchlikka hissa qoʻshadi, chunki «iqtisodiy aloqalar odatda normallashuvga olib keladi». Ukraina bu optimizmga qoʻshilmaydi: prezident Volodimir Zelenskiy The Atlantic jurnalistiga urush tugagunga qadar Rossiyaga nisbatan sanksiyalarni bekor qilish boʻyicha har qanday urinishni «toʻsib qoʻyish» uchun qoʻlidan kelgan barcha ishni qilishini aytdi.
Belarus muxolifati yetakchisi Svetlana Tixanovskayaning fikricha, sanksiyalarni bekor qilish evaziga mahbuslarni ayirboshlash Rossiya va Belarus hukumatlarini koʻproq odamlarni garovga olishga undashi mumkin xolos: «Ular har doim koʻproq odamlarni hibsga olishi mumkin, Gʻarb esa sanksiyalarni bekor qilish va bitimlar tuzish orqali bu rejimlarga taʼsir qilish dastaklarini yoʻqotmoqda».
Kreml bilan muzokaralarda Belarus tajribasini qoʻllashni Koulga «Novaya gazeta»ning sobiq bosh muharriri va Tinchlik boʻyicha Nobel mukofoti sovrindori Dmitriy Muratov taklif qildi - u Shusterdan oʻzini prezidentning maxsus vakili bilan tanishtirishni soʻradi.
Koulda allaqachon Vashington kelajakdagi muzokaralarga kiritishi mumkin boʻlgan, Rossiya qamoqxonalaridagi amerikaliklar roʻyxati mavjud. Muratov bilan birgalikda u rossiyalik siyosiy mahbuslar, jurnalistlar va urushga qarshi pozitsiyasi uchun hukm qilinganlarning alohida roʻyxatini tuzdi. Aniq ismlar va AQSH tomonidan qilinishi mumkin boʻlgan yon bosishlar hozircha oshkor etilmagan.
