Forumda parlamentlararo va hududlararo aloqalarni kengaytirish, savdo-iqtisodiy hamkorlikni kuchaytirish, qoʻshma loyihalarni koʻpaytirish hamda taʼlim, sogʻliqni saqlash, turizm va boshqa sohalardagi aloqalarni rivojlantirish masalalari muhokama qilindi.
Forum doirasida Oʻzbekiston Oliy Majlisi Senati Raisi Tanzila Narbayeva Belarus Milliy majlisi Respublika Kengashi Raisi Natalya Kochanova bilan uchrashdi. Muzokaralarda parlamentlar oʻrtasidagi muntazam muloqotni davom ettirish, oliy darajadagi kelishuvlarni amalga oshirishda parlamentlarning rolini kuchaytirish masalalari koʻrib chiqildi.
Savdo-iqtisodiy aloqalar ham muzokaralarning asosiy yoʻnalishlaridan biri boʻldi. Qishloq xoʻjaligi, mashinasozlik, farmatsevtika, elektrotexnika, toʻqimachilik kabi sohalarda qoʻshma loyihalarni koʻpaytirish, tadbirkorlar oʻrtasidagi toʻgʻridan-toʻgʻri aloqalarni kengaytirish va oʻzaro savdo hajmini oshirish masalalariga eʼtibor qaratildi.
Ikki mamlakat oʻrtasidagi savdo hajmini 2 mlrd dollarga yetkazish maqsadidan kelib chiqib, investitsiyaviy va sanoat kooperatsiyasi loyihalarini qoʻllab-quvvatlash zarurligi qayd etildi. Mehnat migratsiyasi, fuqarolarni qonuniy asosda ish bilan taʼminlash, ularning mehnat va ijtimoiy huquqlarini himoya qilish boʻyicha ham fikr almashildi.
Forum doirasida Xivada “Made in Uzbekistan” va “Made in Belarus” koʻrgazmasi ham tashkil etildi. Unda ikki mamlakatdan 100 dan ortiq korxona oʻz mahsulot va loyihalarini namoyish qildi. Toʻqimachilik, ipakchilik, qishloq xoʻjaligi, oziq-ovqat, mashinasozlik, tibbiyot, IT va boshqa yoʻnalishlardagi mahsulotlar taqdim etildi.
Ayol tadbirkorlar biznes-forumida sanoat kooperatsiyasi, investitsiyalar, agrosanoat, biotexnologiya, turizm hamda gumanitar sohalardagi hamkorlik muhokama qilindi. Tomonlar tadbirkorlar oʻrtasidagi aloqalarni aniq loyihalar bilan davom ettirish masalasiga eʼtibor qaratdi.
Hududlararo hamkorlik ham forumning muhim yoʻnalishlaridan boʻldi. Ikki mamlakat mahalliy vakillik organlari rahbarlari uchrashuvida hududlar oʻrtasida toʻgʻridan-toʻgʻri aloqalarni rivojlantirish, investitsiya va tadbirkorlik loyihalarini qoʻllab-quvvatlash masalalari koʻrib chiqildi. Yakunda hududlararo hamkorlikni kengaytirishga qaratilgan 15 ta ikki tomonlama kelishuv imzolandi.
