Visual Capitalist taqdim etgan reytingda «Katta yigirmatalik» - G20 aʼzolari 2026-yildagi real yalpi ichki mahsulot oʻsishi prognozi boʻyicha taqqoslangan. Materialda qayd etilishicha, hisob-kitoblarga Xalqaro valyuta jamgʻarmasining World Economic Outlook hisoboti yangilanishidagi prognozlar asos qilib olingan.
Geosiyosiy nizolar va taʼminot zanjirlaridagi uzilishlarga qaramay, jahon iqtisodiyotining 2026-yilda 3 foizga oʻsishi kutilmoqda. Biroq yirik iqtisodiyotlarning oʻsish surʼatlari bir-biridan sezilarli farq qiladi.
Real YAIM oʻsishi inflyatsiya taʼsirini hisobdan chiqaradi. Shu bois bu koʻrsatkich ishlab chiqarilgan tovarlar va koʻrsatilgan xizmatlar hajmidagi oʻzgarishni baholashga yordam beradi.
2023-yilda G20 aʼzosiga aylangan Afrika Ittifoqi reytingga kiritilmagan. Materialda bu birlashma yagona iqtisodiyot yoki umumiy bozor emasligi bilan izohlangan.
Osiyo mamlakatlari yetakchilik qilmoqda
Reytingning yuqori oʻrinlarini Osiyo davlatlari egallagan. Hindiston iqtisodiyoti 6,4 foizga, Indoneziyaniki 5 foizga, Xitoyniki esa 4,6 foizga oʻsishi prognoz qilingan.
Hindistonda oʻsishni yirik davlat investitsiyalari va barqaror isteʼmol xarajatlari qoʻllab-quvvatlamoqda.
Materialda keltirilgan prognozga koʻra, Hindiston 2026-yilda dunyoning eng yirik iqtisodiyotlari orasidagi oltinchi oʻrindan 2031-yilga borib uchinchi oʻringa koʻtarilishi mumkin. Bankir Jeymi Daymon ham Hindiston iqtisodiyoti yaqin oʻn yilda uch baravarga oʻsishi mumkinligini aytgan.
Indoneziya tabiiy resurslari va xomashyo narxlarining yuqoriligidan foydalanib, mamlakat ichida qayta ishlash sanoati hamda infratuzilmani rivojlantirmoqda.
Ushbu uch mamlakat orasida iqtisodiyoti eng yirigi boʻlgan Xitoy uchun 4,6 foizlik oʻsish avvalgi oʻn yilliklardagi surʼatlardan ancha past. Koʻchmas mulk bozoridagi zaiflik va kuchayib borayotgan demografik bosim iqtisodiy oʻsishni cheklayotgan omillar sifatida koʻrsatilgan.
Yevropada oʻsish sust boʻlishi kutilmoqda
Yevropa mamlakatlari reytingning quyi qismida koʻproq oʻrin olgan. Prognozga koʻra, 27 davlatni birlashtiruvchi Yevropa Ittifoqi iqtisodiyoti 1,2 foizga, Rossiya iqtisodiyoti esa 1,1 foizga oʻsadi.
