Davlat aktivlarini boshqarish agentligi “Oʻzbekiston pochtasi” aksiyadorlik jamiyati xususiylashtirilgani va kompaniya tomonidan 100 milliard soʻm miqdorida qarz olingani haqida ijtimoiy tarmoqlarda tarqalgan xabarlar haqiqatga toʻgʻri kelmasligini maʼlum qildi.
Bildirilishicha, jamiyat ustav kapitalidagi davlat tashkilotlari, korxonalar va tijorat banklariga tegishli aksiyalar paketi, yaʼni 92,9 foiz davlat ulushi Davlat aktivlari agentligiga toʻliq oʻtkazilgan.
“WILDBERRIES” va “UZUM MARKET” kabi yirik kompaniyalar tomonidan ushbu ulushni sotib olish boʻyicha qiziqish bildirilgan, lekin bugungi kunda davlat ulushini xususiylashtirish boʻyicha hech qanday hujjat rasmiylashtirilmagan.
Taʼkidlanishicha, “Oʻzbekiston pochtasi” aksiyadorlik jamiyati hozirda murakkab moliyaviy va transformatsiya bosqichini boshdan kechirmoqda. Soʻnggi uch yilda sof foyda oʻrtacha 800 million soʻm, rentabellik darajasi esa 0,2 foizni tashkil etgan. 2026-yilning 6 oylik yakunlari boʻyicha tushum 313,6 milliard soʻmni tashkil etib, oʻtgan yilning mos davriga nisbatan 17 foizga kamaygan.
Bundan tashqari, asosiy daromad manbalaridan biri boʻlgan yoʻl harakati qoidalari buzilganligi toʻgʻrisidagi qarorlarni pochta orqali yetkazib berish xizmati joriy yilning 16-may kunidan toʻxtatilgan. Ushbu xizmat toʻxtashi oqibatida 9 oy yakunlari boʻyicha 1,7 milliard soʻm miqdorida zarar koʻrilishi kutilmoqda. Shu bilan birga, bank qarzdorligi 45,3 milliard soʻmni tashkil etmoqda.
Qayd etilishicha, elektron tijorat bozorining shiddatli rivojlanishi pochta infratuzilmasini tubdan modernizatsiya qilishni talab etmoqda. Dastlabki hisob-kitoblarga koʻra, modernizatsiya va raqamlashtirish loyihalarini amalga oshirish uchun 300 milliard soʻmdan ortiq mablagʻ zarur. Ushbu mablagʻ doirasida yuk avtotransporti va elektr transport vositasini sotib olish, saralash markazi hamda IT-infratuzilmani yangilash, qoʻshimcha pochtamatlarni oʻrnatish va aloqa obyektlarini taʼmirlash kabi chora-tadbirlar koʻzda tutilgan.
Jamiyatga zamonaviy boshqaruv modellarini joriy etish hamda investitsiyalarni jalb qilish maqsadida mamlakatdagi yirik marketpleys kompaniyalaridan biri boʻlgan “WB INT EXPORT” MCHJ bilan hamkorlik qilish koʻzda tutilgan. Muzokaralar davomida ushbu kompaniya Markaziy bankning qayta moliyalashtirish stavkasida 100 milliard soʻm miqdorida qarz mablagʻini taqdim etishga tayyorligini bildirgan.
Mazkur bitim qonunchilikka koʻra yirik bitim hisoblangani bois aksiyadorlar umumiy yigʻilishi kun tartibiga kiritilgan. Biroq foiz stavkalari, qarz miqdori va qaytarish grafigi boʻyicha yakuniy kelishuvga erishilmaganligi sababli, aksiyadorlarning navbatdan tashqari umumiy yigʻilishida bu masalada qaror qabul qilinmagan.
