Bu masalalar Oʻzbekiston elchisi Alisher Toʻxtayev va Maroof International Hospital rahbari Nosir Ahmadning Islomoboddagi uchrashuvida koʻrib chiqildi. Bu haqda «Dunyo» axborot agentligi xabar berdi.
Muzokaralarda sogʻliqni saqlash, tibbiy taʼlim va tibbiy turizm sohalarida amaliy hamkorlikni kengaytirish istiqbollari muhokama qilindi. Pokiston vakili Oʻzbekistonda diagnostika va ixtisoslashtirilgan tibbiy xizmatlar boʻyicha investitsiya loyihalarini amalga oshirishdan manfaatdor ekanini bildirdi.
Hamkorlikning dastlabki bosqichida Oʻzbekistondagi tibbiyot texnikumlari bilan birgalikda 3–6 oylik qisqa muddatli oʻquv dasturlarini ishlab chiqish taklif etildi.
Ushbu dasturlar hamshiralar, laboratoriya mutaxassislari va shoshilinch tibbiy yordam xodimlarini zamonaviy usullar asosida tayyorlash hamda malakasini oshirishga qaratilgan boʻladi.
Shuningdek, malakali mutaxassislar ishtirokida onlayn darslar, mahorat darslari va amaliy treninglar oʻtkazish imkoniyatlari koʻrib chiqildi. Talabalar uchun qisqa muddatli amaliyot dasturlarini tashkil etish va tajriba almashish masalalari ham muhokama qilindi.
Tibbiy texnologiyalar va farmatsevtika sohasidagi hamkorlik doirasida Buxoro viloyatida Janubiy Koreya texnologiyalari asosida ishlab chiqarilayotgan koronar stentlarga alohida eʼtibor qaratildi. Nosir Ahmad ushbu mahsulotlarni Pokiston bozoriga eksport qilishga qiziqish bildirdi.
Tomonlar tibbiy turizmni rivojlantirish boʻyicha takliflarni ham qoʻllab-quvvatladi. Xususan, Pokiston fuqarolari uchun Oʻzbekistonda diagnostika, davolanish va sogʻlomlashtirish xizmatlarini turizm dasturlari bilan uygʻunlashtirish muhokama qilindi.
Oʻz navbatida, Maroof International Hospital klinikalarida oʻzbekistonlik bemorlarga tibbiy xizmat koʻrsatish imkoniyatlarini kengaytirish taklif etildi.
2009-yilda tashkil etilgan Maroof International Hospital - 220 oʻrinli koʻp tarmoqli xususiy tibbiyot muassasasi. Unda kardioxirurgiya, bolalar kardioxirurgiyasi, neyroxirurgiya, minimal invaziv jarrohlik, ginekologiya, pediatriya, reanimatsiya va shoshilinch tibbiy yordam yoʻnalishlari mavjud.
Xabarda Oʻzbekistonda tashkil etilishi muhokama qilingan markaz yoki klinikaning joylashuvi, investitsiya hajmi va ochilish muddati keltirilmagan.
