Anthropic, OpenAI va boshqa SI kompaniyalari rahbarlari sunʼiy intellekt bilan bogʻliq “halokatli hodisa” yuz bergan taqdirda jamiyat va hukumat reaksiyasi ssenariylarini yopiq tarzda muhokama qilmoqda. Gap, jumladan, moliyaviy xizmatlar, internet yoki elektr va suv taʼminoti tizimlarining uzilishiga olib kelishi mumkin boʻlgan keng koʻlamli kiberhujum haqida bormoqda, deb yozdi Axios.
Xavfsizligi taʼminlanmagan SI tufayli yetkaziladigan jiddiy zararning ilk holati texnologiyaga hamda uning yetakchilariga, xususan, Anthropic va OpenAI rahbarlari Dario Amodei va Sem Altmanga boʻlgan ishonchsizlikni kuchaytirishi mumkin. Shuningdek, sohani tartibga solishni istamayotgani sababli bu tanqidlar AQSH prezidenti Donald Trampga ham qaratilishi mumkin.
OpenAI ehtimoliy ssenariylarni koʻrib chiqish boʻyicha mashgʻulotlar oʻtkazayotganini Axios’ga maʼlum qildi. Anthropic esa izoh berishdan bosh tortdi. Shu bilan birga, sohaning koʻplab vakillari nashrga yaqin 6–12 oy ichida yirik hodisa yuz berishini kutayotganligini bildirishgan.
Axios tahdidlarga misol sifatida Janubiy Koreyadagi moliya muassasalariga yaqinda uyushtirilgan hujumlarni, jumladan, ikkita bankning buzilishi va oʻn minglab mijozlar maʼlumotlarining oʻgʻirlanishini keltirmoqda. CrowdStrike maʼlumotlariga koʻra, xitoylik ekani taxmin qilingan xaker oʻgʻirlangan maʼlumotlarni sotish maydonchalarini qidirish uchun SI vositalaridan, jumladan Claude Code’dan foydalangan.
Kompaniyalar yirik hodisadan soʻng siyosatchilar SI rivojlanishini keskin cheklashga urinishidan xavotirda. Demokratlarning takliflari orasida superintellekt yaratishni taqiqlash va ilgʻor tizimlarni ishlab chiqishni vaqtincha toʻxtatish ham bor. Boshqa tashabbuslar, masalan, mukammal modellarni “avariya oʻchirgichi” bilan jihozlash talabi har ikki partiya tomonidan qoʻllab-quvvatlanmoqda, ammo ekspertlar barcha SI tizimlarini oʻchirib qoʻyishning imkoni borligiga shubha bilan qaramoqda.
Sunʼiy intellekt xatarlari borasidagi munozaralar avtonom SI agentlari sinov muhitidan chiqib, real tizimlarga hujum qilgan holatlar fonida yanada kuchaydi. Anthropic va OpenAI rahbarlari xavfsizlik choralarini kuchaytirishga chaqirmoqda, biroq ular yoʻl qoʻyilishi mumkin boʻlgan xatarlarni baholashda turlicha fikrda.
Iyul oyida OpenAI “misli koʻrilmagan kiberhodisa” yuz bergani haqida xabar berdi: sinovdan oʻtkazilayotgan modellar Hugging Face platformasi infratuzilmasiga hujum qilib, zaifliklarni aniqlagan. Modellar ilgari nomaʼlum boʻlgan nol kunlik (Zero–Day) zaiflikni mustaqil ravishda topib, undan foydalangan va oʻgʻirlangan hisob maʼlumotlari orqali Hugging Face serverlariga kirib borgan.
