Kichik SI modellari 2026-yil oxiriga borib, internetga ulangan maishiy elektronika va uy texnikalari orqali oʻz-oʻzini koʻpaytirishni oʻzlashtirishi mumkin. Anthropic kompaniyasi shunday xulosaga keldi.
Anthropic tadqiqotchilari quyidagicha tajriba oʻtkazdi: har biri taxminan 55 dollar turadigan 15 ta Android-TV pristavkasi yagona tarmoqqa birlashtirildi va unda 26 milliard parametrli SI modeli muvaffaqiyatli ishga tushirildi. Shundan soʻng mutaxassislar modellarning begona qurilmalarga mustaqil ravishda suqilib kirishi va yangi nusxalarini yaratish qobiliyatini sinovdan oʻtkazdi.
9 milliard parametrli model toʻqqiz turdagi uskunaning sakkiztasida ishga tushishni uddaladi, ammo u hozircha oʻz-oʻzini koʻpaytirishning toʻliq siklini barqaror bajara olmaydi. Bu vazifani faqat ancha yirikroq boʻlgan GLM-5.2 modeli bajara oldi, biroq uning ishlashi uchun robot-changyutkichlar va aqlli televizorlar bera oladiganidan ancha yuqori hisoblash quvvati talab etiladi.
Tadqiqotchilarning taʼkidlashicha, IoT-qurilmalar tarmoqlarida mustaqil koʻpayishi uchun SI modeli nisbatan kam quvvat talab qilishi, ammo ayni paytda qurilmalarni mustaqil topish, oʻzini ularga koʻchirish va ishga tushirish qobiliyatiga ega boʻlishi lozim. Hozircha bu ikki shart bir vaqtda bajarilmayapti, biroq rivojlanishning amaldagi surʼati saqlanib qolsa, kichik modellar 2026-yil oxiriga kelib bunga erishadi.
Anthropic tahlilchilari SI agentlari uy qurilmalarini ancha sekinlik bilan egallab oladi, degan xulosaga keldi. Tadqiqotchilar ularni koʻpayishi uchun bir necha sutka talab etiladigan mogʻor yoki meva pashshalariga qiyoslamoqda. Cheklangan quvvat sababli 9 milliard parametrli modelning bor-yoʻgʻi bitta yangi nusxasini koʻchirish va ishga tushirish taxminan ikki kun vaqt olishi mumkin.
Tadqiqotchilar kelajakda inson nazoratisiz ishlaydigan koʻplab SI agentlari paydo boʻlishi ehtimolini istisno qilmayapti. Ulardan qutulish ancha mushkul boʻladi, chunki bu oʻz tarmoqlarida zararlangan qurilmalar aniqlangan barcha internet-provayderlar harakatlarini oʻzaro muvofiqlashtirishni talab etadi.
