Toshkent shahar transport va yoʻl-transport infratuzilmasini rivojlantirish bosh boshqarmasi maʼlumotiga koʻra, qurilish munosabati bilan Shahrisabz va Istiqbol koʻchalari kesishmasida chapga burilish vaqtincha cheklangan.
Shu sababli mazkur chorraha orqali oʻtuvchi beshta avtobus yoʻnalishi shahar markazidan harakatlanishda vaqtincha Shahrisabz, Maxtumquli va S. Azimov koʻchalari orqali qatnaydi.
Boshqarma hududda transport oqimi ortishi va tirbandliklar yuzaga kelishi mumkinligini bildirgan. Bu avtobuslarni kutish vaqti uzayishiga olib kelishi mumkin. Zarur hollarda yoʻnalishlar harakatiga qoʻshimcha oʻzgartirishlar ham kiritiladi.
Yoʻlovchilardan qatnovlarini oldindan rejalashtirish soʻralgan. Cheklovlar qachongacha amal qilishi eʼlonda koʻrsatilmagan.
