2009-yilda AQShda gʻalati oʻlim sodir boʻladi. 26 yoshli shifokor Yutadagi gʻorga borib, boshi berk yoʻlakda tiqilib qoladi. Qutqaruvchilar harchand urinmasin, yigitni chiqarib ololmaydi. Oqibatda oyogʻi tepada, boshi pastda boʻlib qolgan shifokor oʻsha joyda qiynalib jon beradi.
Dunyoda gʻayrioddiy oʻlimlar koʻp sodir boʻlgan. Mashhurlar bilan boʻlganlari koʻpchilikning esida qolgan. Masalan, raqqosa Aysedora Dunkan mashinada sayrga ketayotganida avtomobil gʻildiragiga oʻralib qolgan sharf tufayli halok boʻladi. Milliarder Sanjay Kapur ari chaqib oʻladi. Avstraliya bosh vaziri Garold Xolt choʻmilishga borib, dengizda gʻarq boʻladi.
Bunday misollar juda koʻp. Bugun hikoya qilmoqchi boʻlgan qahramonimiz Jon Jons ham gʻalati tarzda oʻlim topgan. Afsuski, uni hayotda qilgan ishlari emas, qanday oʻlgani mashhur qildi.
Natti-Patti gʻori haqida
Natti-Patti Yutada joylashgan AQShdagi mashhur gʻorlardan biri boʻlib, uni ilk bor 1960-yil gʻorshunos Deyl Grin oʻrgangan. Olim ichida loyqa koʻpligi uchun gʻorni Natti-Patti deb ataydi, yaʼni inglizchada yongʻoqli pasta degani. Gʻorga yiliga 5 minggacha odam boradi. Undagi asosiy xavf sirtlar sirpanchiqligi edi. Odamlar oqimi koʻpaygach, tinimsiz qadamlar taʼsirida qoyatoshlar yanada silliqlanib ketadi.
Gʻordagi eng mashhur joyni «Big slide» (katta sirpanchiq) deb atashadi. Bu joyda oyoq osti juda sirpanchiq boʻlgani uchun shunday nom olgan. 2006-yil odamlar Natti-Pattiga yuqori darajada aks taʼsir oʻtkazayotganini baholash boʻyicha tadqiqot boshlanadi. Vaziyat boʻyicha xulosalar chiqqach, gʻorga keluvchilar sonini cheklash taklif qilinadi. Koʻp oʻtmay gʻorning kirish qismiga toʻsiq oʻrnatilib, tashrif buyuruvchilar uchun vaqtincha yopiladi.
Gʻorga kirishni tartibga soluvchi xavfsizlik talablari ishlab chiqilgach, 2009-yil 18-mayda qayta ochiladi. Biroq oʻsha yili noyabrda gʻor tashrif buruvchilar uchun butunlay yopiladi. Bunga Jon Jons ismli yigitning oʻlimi sabab boʻladi.
