«MU»ga raqibdagi qizil yordam bermadi, «Arsenal»da kambek, «Barsa»da gʻalabali seriya
|14:333 52411 min
«MU» koʻpchilik boʻlib oʻynab, gʻalabani qoʻldan chiqardi, «Barselona» Rafinyasiz ham yirik hisobda gʻalaba qozonmoqda. Shanba oqshomida Yevropa futbolida roʻy bergan asosiy voqealar, oʻyinlardagi gollar va turnir jadvallaridagi vaziyat.
Foto: Martin Rickett/PA Images via Getty ImagesFoto: Martin Rickett/PA Images via Getty Images
«MU»ning «Tottenhem»ga qarshi oʻyini – klublar futbolidagi ikki top-jamoa toʻqnashuvidan iborat ilk oʻyin boʻldi. Boshqa tomondan, ularning hozirgi maqomi haqida aniq gap aytib boʻlmaydi. Oʻzaro oʻyindan oldin «MU» turnir jadvalida 12-, «Tottenhem» – 20-oʻrinda edi.
Birinchi boʻlimda muxlislar gol koʻrishmadi, ammo oʻyin ancha tomoshabop kechdi. Tablodagi hisob teng boʻlib qolgan boʻlsa-da, jamoalar oʻyini haqida bunday deb boʻlmasdi. Mezbonlar maydonda nima qilishini bilmasdi, londonliklar esa istaganini qilishdi.
Roberto de Zerbi shogirdlari shu qadar katta ustunlikka ega boʻlishdiki, 25-daqiqagacha boʻlgan oraliqda raqib himoya hududidagi toʻpga teginishlar soni boʻyicha koʻrsatkich noodatiy koʻrinish oldi – 6:52.
«Tottenhem» hisobni ochish uchun yetarlicha vaziyatlar yaratdi, eng xavflisi Quddus ishtirokidagi hujum boʻldi. Ganalik hujumchi juda qulay masofadan zarba berdi, ammo toʻp ustun yonidan oʻtib ketdi. Qolgan vaziyatlarda ham yoki darvozabon aniqroq harakat qildi yoki mehmonlarda aniqlik yetishmadi. «MU»dagi yagona vaziyat esa qarshi hujumda Amadda yuzaga keldi, ammo jarohatdan endigina qaytgan futbolchining zarbasi juda kuchsiz chiqdi va darvozabon hech qanday muammosiz toʻpni egallab oldi.
Ikkinchi boʻlimda «MU» nihoyat futbol oʻynay boshladi, lekin ancha vaqtgacha tashabbus «Tottenhem»da qoldi. Vaziyatlardan birida Shou toʻpni darvoza chizigʻi oldida toʻxtatib qoldi. Keyin esa Solanke golga juda yaqin keldi, ammo uning darvozabon maydonchasi oldida turib bergan zarbasidan keyin toʻp yuqoridan oʻtib ketdi. Shundan keyingina mezbonlar ham hujumlar uyushtira boshladi. «MU» koʻproq oʻng qanotdan hujum qildi, golni esa chap qanotdan urdi. Mbemo jarima maydoni ichida toʻpni Kunyadan qabul qilib oldi va oʻgirilib, olis burchakni aniq nishonga oldi.
Mavzuga oid
77-daqiqada esa hissiyotlar nazoratdan chiqib ketdi va maydonda futbolchilar oʻzaro munosabatlarga oydinlik kiritishga kirishib ketdi. Barchasi van Hekkening xavfli podkatidan boshlandi. Toʻp mehmonlarda qoldi va hujum davom ettirildi. Keyin esa Bentankur toʻpni Shouning oyoqlari orasidan yechib oldi va autga chiqarib yubordi. Shundan keyin ingliz himoyachisi raqibining koʻkragidan itarib yiqitdi. Urugvaylik yarimhimoyachi bunga javoban raqibga bosh bilan hamla qildi (lekin tegmadi), ingliz himoyachisi jiddiy zarba qabul qilgandek yiqildi, hakam esa Shouga sariq, Bentankurga qizil kartochka koʻrsatdi.
Mezbonlar koʻpchilik holatida gʻalabali hisobni saqlab qolishi kutilgandi. Ammo bunday boʻlib chiqmadi. Oʻyinga qoʻshib berilgan daqiqalarda Tonalining qanotdan uzatmasidan keyin Solanke birinchi boʻlimdagi aybini yuvdi. Ushbu forvard toʻp uchun kurashda Lisandro Martinesdan ustun keldi va bosh bilan burchakka aniq zarba yoʻlladi – 1:1.
«MU» va Kerrikka savollar koʻpaymoqda: jamoa oʻz uyida turnir jadvalining 20-oʻrindagi jamoasiga qarshi oʻyinda bir kishi boʻlib gʻalabali hisobni ushlay olmadi. Bungacha «Everton», «Nyukasl» (oʻtgan mavsumda) va «Siti»ga qarshi oʻyinlarda son jihatdan ustunlik boʻlsa-da, magʻlubiyatga uchragandi.
Yakunda oʻzi haqli boʻlgan ochkoni qoʻlga kiritgan «Tottenhem» esa 18-oʻringa koʻtarilib oldi.
Hafta oʻrtasida «Arsenal» Mikel Arteta va uning assistentlari bilan kelishuvni yana uch mavsumga – 2030-yil yoziga qadar uzaytirgandi. Murabbiy esa xalqaro tanaffusdan keyingi ilk oʻyinda jamoa boshlangʻich tarkibida biratoʻla 6 nafar ingliz futbolchisini tushirdi – bunaqasi londonliklarda 1999-yil fevralidan buyon kuzatilmagandi.
Xalqaro tanaffusdan oldin «Arsenal» «Brayton»ga yirik hisobda yutqazib (0:3), turnir jadvalidagi peshqadamlikni «Manchester Siti»ga boy bergandi. Shanba kungi oʻyinda esa «Lids» ham «Brayton» qoʻllagan uslubdan foydalanib, «kanonirlar»ni noqulay ahvolga tushirib qoʻydi. Daniel Farke shogirdlari himoyada tartibli harakatlandi va xavfli qarshi hujumlar uyushtirdi. Oʻyinda hisob birinchi boʻlimdayoq ochilishi mumkin edi, ammo Rayya bir necha marta jamoasini muqarrar gollardan qutqarib qoldi. Ikkinchi boʻlim boshida esa mehmonlar baribir oʻz maqsadiga erishdi va Jastin hisobni ochdi.
Shundan keyin esa «Lids» chuqur himoyaga yotishga qaror qildi va bu xato qaror boʻlib chiqdi. Oʻyinning qolgan qismida mezbonlar raqibga birorta xavfli vaziyat yaratishga imkon berishmadi va oʻz imkoniyatlaridan foydalanib, gʻalabani oʻz tomoniga ogʻdirdi. Avvaliga jarima maydonida paydo boʻlgan himoyachi Kalafiori barchadan ildamroq harakat qilib, hisobni tenglashtirdi. Biroz oʻtib zaxiradan tushgan Bruno Gimaraysh jarima maydoni tashqarisidan yoʻllagan zarbasi bilan gʻalaba golini urdi. Endi Arteta jamoasi ochkolar soni boʻyicha «Manchester Siti»ga yetib oldi va bugun «shaharliklar» «Liverpul»ga qarshi oʻyinda yutqazsa, londonliklar birinchi oʻringa chiqib olishi ham mumkin.
«Chelsi»ning ayrim muxlislari yozda Hendersonning transferiga shubha bilan qarashgandi, shanba kuni «Bornmut»ga qarshi oʻyinda esa ushbu 36 yoshli yarimhimoyachi shundaylarga javob qaytardi. Mehmonlar dastlabki 3 daqiqa ichida ikki gol oʻtkazib yuborishdi – Henderson avvaliga jarima maydoni tashqarisidan qaytarib boʻlmas zarba yoʻlladi, keyin esa Rodjersning goliga assistentlik qildi. Xabi Alonso boshqaruvidagi londonliklar tezkor gol urishni anʼanaga aylantirib olishdi: joriy mavsumda ular olti marta dastlabki oʻn daqiqalikda raqiblar darvozasini ishgʻol etishgan.
Ammo oldingi oʻyinlarda «Chelsi» koʻpincha boʻlim davomida sustlashgan va raqibga oʻyinga qaytish imkonini bergandi. Bu safar ham jamoa qatorasiga 23-oʻyinda gol oʻtkazib yubordi, ammo bu gol «Stemford Brij»da yigʻilgan muxlislarni ranjita olmadi – bungacha Joau Pedro hisobdagi farqni oshirib boʻlgandi. Oʻyindan oldin jarohati tufayli maydonga tushishi soʻroq ostida ekani aytilgan ushbu braziliyalik hujumchi shu kuni dublni rasmiylashtirib, hisobni yirik koʻrinishga keltirdi. Palmer esa barcha jarima zarbasini u ijro etishini kutib turganida toʻpni Hendersonga berib yubordi va hisob yanada yiriklashdi. Bu gʻalabadan keyin «Chelsi» toʻrtinchi oʻrindagi «Brentford»ga ochkolar soni boʻyicha yetib oldi.
Gordonning «Barselona»dagi ishlari yurishgandan yurishmoqda. U har oʻyinda jamoadoshlari uchun vaziyatlar yaratmoqda va golli paslar bermoqda, Hansi Flik u hali gol urmagani borasida navbatdagi oʻyindan oldin shunday degandi: «Gollar ham albatta boʻladi». Gordon esa «Xetafe»ga qarshi oʻyinning 78-soniyasidayoq raqib himoyasini yorib oʻtdi va la liganing joriy mavsumidagi eng tezkor gol muallifiga aylandi.
Boʻlim davomida esa Gabriel Jezus raqib jarima maydoni ichida sovuqqon harakatlanib, hisobdagi farqni oshirdi. «Arsenal»ga kerak boʻlmay qolgan ushbu braziliyalik Ispaniyada javlon urmoqda: uning koʻk-anorranglilar safidagi darvoza sohasiga toʻgʻri borgan uchta zarbasi ham golga aylandi. Yamal esa shu kuni «Barselona»ning bu mavsum startidagi sakkiz oʻyinning barchasida maydonga tushgan yagona futbolchisiga aylandi. Bu oʻyinda Lamin oʻz uslubidagi uzatmasi bilan Kundening goliga hammualliflik qildi. «Barsa»da jamoa sardori va yetakchisi Rafinyaning yoʻqligi sezilmayapti va yirik hisobda gʻalaba qozonishda davom etmoqda. Startdagi sakkizta oʻyinda ham gʻalaba qozongan kataloniyaliklar eng yaqin taʼqibchisidan besh ochkolik farq bilan peshqadamlik qilmoqda. Flik shogirdlari 1968-yil mavsumni qatorasiga toʻqqiz oʻyinda gʻalaba qozonish orqali boshlagan «Real»ning rekordini takrorlashi uchun yana bir oʻyin qolmoqda (keyingi tur kuchli uchlikdagi «Betis»ga qarshi safarda boʻlib oʻtadi).
«Atletiko» «Alaves»ga qarshi qiyin oʻyinda gʻalaba qozondi va kamida «Betis»ning yakshanba kungi oʻyini yakunigacha ikkinchi oʻringa koʻtarilib oldi. Yozgi transferlar vaqtida erkin agent sifatida «Bayer»dan kelgan himoyachi Grimaldoning ketma-ket ikkinchi oʻyindagi goli gʻalaba uchun yetarli boʻlmadi. Birinchi boʻlimga qoʻshib berilgan daqiqalarda «matraschilar» darvozaboni ishlatgan fol tufayli penalti belgilandi va hisob tenglashdi. Diyego Simeone shogirdlari faqat oʻyin oxirlarida gʻalaba golini urishdi. Yozda «Tottenhem»dan erkin agent sifatida kelgan boshqa bir himoyachi Romero Aleks Baenaning uzatmasini golga aylantirdi. Ispaniya milliy jamoasi Madriddagi ikkinchi mavsumida yuqori sport formasini namoyish etmoqda va dastlabki sakkiz turdagi golli harakatlari (4+2) butun oʻtgan mavsumdagidan koʻproq boʻlmoqda.
