DW xabariga koʻra, Donald Tusk 11-oktabr kuni X ijtimoiy tarmogʻida ushlash haqida maʼlum qilgan.
«Hujum qilish bilan tahdid qilgan erkak ushlandi. Politsiya xodimlariga tezkor va qatʼiy harakatlari uchun minnatdorlik bildiraman», - deb yozgan Polsha bosh vaziri.
Ichki ishlar vaziri Marchin Kervinskiy TVP Info efirida huquqni muhofaza qiluvchi organlar gumonlanuvchining aloqalari va internetdagi faoliyatini tekshirayotganini aytgan. Vazirlik matbuot kotibi Karolina Galetskaya esa uning uyida tintuv oʻtkazilayotganini bildirgan.
Bundan avval Polsha Ichki xavfsizlik agentligining terrorizmga qarshi kurash markazida shoshilinch yigʻilish boʻlib oʻtgan. AFP maʼlumotiga koʻra, unda politsiya, hukumat aʼzolari xavfsizligiga masʼul Davlat qoʻriqlash xizmati va Ichki xavfsizlik agentligi vakillari qatnashgan.
Kuch tuzilmalari vakillari ushbu ishga jiddiy yondashayotganini taʼkidlagan.
Kervinskiyning aytishicha, ehtimoliy suiqasd tayyorgarligiga xorijdan aloqadorlik borligi haqida gapirishga hali erta. U dastlabki maʼlumotlarga koʻra, gumonlanuvchi «oʻta radikal doiralar» bilan bogʻliq boʻlishi va turli shaxslar bilan aloqa qilgan boʻlishi mumkinligini bildirgan.
Donald Tusk 2023-yil dekabrdan Polsha bosh vaziri lavozimida ishlab kelmoqda. Vladislav Kosinyak-Kamish esa mudofaa vaziri boʻlish bilan birga, bosh vazir oʻrinbosari ham hisoblanadi.
Polsha Ukrainaning Yevropadagi asosiy hamkorlaridan biri boʻlib, Kiyevga harbiy va gumanitar yordam yetkazib berishda muhim tranzit mamlakat vazifasini bajaradi.
Tusk sentabrda razvedka maʼlumotlariga tayanib, Rossiya Ukrainani qoʻllab-quvvatlayotgan davlatlarga, jumladan, Polshaga qarshi dronlar va raketalardan foydalangan holda gibrid hujumlar rejalashtirayotgani haqida ogohlantirgan edi. Varshava Moskvani bir necha bor diversiyalarda ayblagan, Rossiya rasmiylari esa bu ayblovlarni rad etgan.
Biroq hozirgi ishning Rossiya yoki boshqa xorijiy davlat bilan bogʻliqligi tasdiqlangani haqida maʼlumot berilmagan.
