DW xabariga koʻra, 11-oktabrga oʻtar kechasi Ukraina dronlari «Yandeks»ning oltita yirik data-markazidan uchinchisiga - Vladimir shahridagi obyektga hujum qilgan. Shundan keyin «Sboy.rf» va Downdetector monitoring saytlarida turli xizmatlar ishi boʻyicha shikoyatlar qayd etilgan.
Foydalanuvchilar «Yandeks Pey», «Yandeks Igry», «Yandeks Go» va «Kinopoisk» xizmatlaridan foydalanishda qiyinchiliklarga duch kelgan.
Taksi buyurtma qilish bilan bogʻliq muammolar haqida Armaniston, Belarus, Gurjiston, Qozogʻiston va Serbiyadagi foydalanuvchilar ham xabar bergan.
Uzilishlar faqat «Yandeks» servislari bilan cheklanmagan. «Vkusno - i tochka», KFC va «Dodo Pitssa» tarmoqlari, Lamoda onlayn doʻkoni, Sports.ru portali, «Pyatyorochka», «Magnit» va «Lenta» savdo tarmoqlari resurslariga kirishda ham muammolar kuzatilgan.
Shuningdek, Sankt-Peterburgdagi Pulkovo aeroporti, Flowwow gul yetkazib berish xizmati, «Sian» koʻchmas mulk platformasi va «Dom.ru» internet provayderi foydalanuvchilari ham shikoyat qilgan.
Qandli diabeti bor insonlarga glyukoza darajasini onlayn kuzatish imkonini beruvchi mahsulotlar ishlab chiqaradigan Sinocare kompaniyasi ham xizmatlarida muammolar yuzaga kelganini bildirgan.
Hujumlardan keyin «Yandeks» ilovalaridagi qoʻllab-quvvatlash xizmati ham ishlamay qolgan. Kompaniya yordam soʻrash uchun servislarning ijtimoiy tarmoqlardagi rasmiy sahifalariga murojaat qilishni tavsiya etgan.
Tizimga tushayotgan yuklamani kamaytirish maqsadida ayrim bulutli xizmatlar, jumladan, «Disk»ning baʼzi funksiyalari ataylab oʻchirilgan.
11-oktabr kechqurun «Yandeks» servislar bosqichma-bosqich tiklanayotganini maʼlum qilgan.
«Alisa, qidiruv, “Yandeks Xaritalar”, taksi, pochta va boshqa servislarga kirish tiklanmoqda. Biroq ularning ayrim funksiyalari hozircha ishlamayapti», - deyilgan kompaniya bayonotida.
«Yandeks» oʻz obyektlariga hujumlar haqida ilk bor 9-oktabrda, ketma-ket ikki kecha davomidagi dron zarbalaridan soʻng maʼlum qilgan edi. Kompaniya Ryazan viloyatining Sasovo shahridagi data-markaz «jiddiy shikastlangani», Kalugada esa infratuzilmaning bir qismi ishdan chiqqanini bildirgan.
