Rossiya hukumati ukrainlar Wildberries va Ozon marketpleyslariga zarba berishini kutmagandi, dedi Vladimir Putin «Delovaya Rossiya» qurultoyida chiqish qilib.
«Siz ayttgan muammolardan xabarim bor – afsuski, biz dushmanning ham Wildberries, ham Ozon platformalariga nisbatan harakatlariga duch keldik. Darvoqe, ular doim shunday qadamlarni tashlaydilarki, ochigʻini aytganda, biz bularni oldindan koʻra bilishimiz kerak edi. Ammo biz ular bu darajaga bormaydi deb oʻylagandik», – dedi Putin. U Wildberries asoschisi Tatyana Kimning Ukrainaning kompaniya omborlariga bergan zarbalari haqidagi chiqishiga shunday munosabat bildirdi.
U soʻzida davom etib, Rossiya bunday zarbalarga «javob qaytarishni boshlagach», Ukraina tomoni «homiylarining oldiga chopib, [Rossiyaga] taʼsir koʻrsatish va toʻxtatishni yolvorib soʻrashi»ni aytadi. U energetika obyektlari boʻyicha ham xuddi shunday holat takrorlanganini taʼkidlaydi. Shu bilan birga, Ukrainaning Rossiyadagi neftni qayta ishlash zavodlari boʻylab yoʻllagan soʻnggi zarbalari «jiddiy boʻlmagani»ni qoʻshimcha qilgan.
Putin Rossiya allaqachon bu hujumlarga javob qaytarishni boshlaganini qayd etgan: «Ular birinchi boʻlib qadam tashladi. Biz javob qaytarishni boshladik. Hozir u tomonda energetika boʻyicha ham, boshqa obyektlar, jumladan, maʼlumotlarni qayta ishlash markazlari va shu kabilar yuzasidan ham dod-voy solishyapti. Buni ularning oʻzi boshladi. Boshlamaslik kerak edi. Bu qadamni qoʻyishdan avval uning oqibatlari haqida yaxshilab oʻylab koʻrish lozim edi».
«Agentstvo» bu Putin maʼlumotlarni qayta ishlash markazlari boʻylab zarbalar yuzasidan ilk bor munosabat bildirishi ekanini qayd etgan. Shu bilan birga, kontekstdan u qaysi tomonning zarbalarini nazarda tutgani tushunarsiz: Ukraina qurolli kuchlarining «Yandeks» va Sberning maʼlumotlarni qayta ishlash markazlariga zarbalarinimi yoki Rossiyaning shu kabi hujumlarinimi.
Sentabr oyida Rossiya Ukrainadagi bir necha data-markazlarga hujum qilgan, Rossiya mudofaa vazirligi esa Kiyevga «raqamli detoks» bilan tahdid qilgandi. 10-oktabr kuni, Ukraina qurolli kuchlarining «Yandeks»ga hujumlari boshlanganidan soʻng, Rossiya Ukrainaning Tenet provayderining Odessadagi data-markaziga va Kiyevdagi «Ukrsibbank ATM»ga zarba berdi.
13-oktabr kuni prezident matbuot kotibi Dmitriy Peskov Rossiyadagi data-markazlarga hujumlar mavzusi hukumatda muhokama qilinganini aytdi. Keyingi kuni Putin kiberxavfsizlik masalalari boʻyicha yigʻilish oʻtkazdi.
Tadbirning ochiq qismida Putin yigʻilish ishtirokchilaridan «raqamli xavfsizlik darajasini oshirish imkonini beradigan» takliflarni kutayotganini aytdi. U «toʻgʻridan toʻgʻri va gibrid tashqi tajovuz fonida» kibertahdidlar yangi bosqichga koʻtarilayotganini taʼkidlagan. Shu bilan birga, data-markazlarga zarbalarni tilga olmagan.
