Parij avtosalonida ixcham Hyundai Bayon krossoverining butunlay yangi versiyasi debyut qildi. Janubiy Koreya brendi vakillarining maʼlum qilishicha, model tashqi va texnik jihatdan sezilarli darajada yangilangan.
Asosiy oʻzgarish - radikal qayta dizayn boʻlib, u avtomobilni yoʻlda yanada koʻzga tashlanadigan qilishga qaratilgan. Uslub asosini Tucson modelining soʻnggi avlodidan tanish boʻlgan Art of Steel konsepsiyasi tashkil etadi. Bu xarakterli detallarda yaqqol koʻrinadi: «xokkey klyushkasi» shaklidagi kunduzgi chiroqlar, kapotning koʻtarilgan chizigʻi, gʻildirak arkalarining massiv kengaytirgichlari. Model nomi endi yukxona qopqogʻida, Hyundai emblemasi ostida yirik harflar bilan yozilgan.
Bayon uchun ilk bor N Line komplektatsiyasi taqdim etildi: u 18 dyuymli gʻildiraklar, qoʻshaloq tutun quvurlari, salonda esa qizil chokli bezaklar va metall pedallarni oʻz ichiga oladi.
Eksteryerdagi oʻzgarishlar hisobiga krossover avvalgisidan vizual jihatdan kattaroq koʻrinadi. Kenglik hissi texnik jihatdan ham mustahkamlangan: gʻildiraklar bazasi 20 mm ga uzaytirilib, 2600 mm ga yetkazilgan.
Mavjud opsiyalar qatorida 12,3 dyuymli ikkita ekran, doiraviy koʻrish kameralari, ventilyatsiyali oʻrindiqlar va panoramali tom mavjud. Shuningdek, Digital Key 2 tizimi (smartfon orqali avtomobilni ochish va ishga tushirish) hamda Bose audiotizimi taklif etiladi. Shu bilan birga, salondagi konsolda anʼanaviy fizik tugmalar bloki qoldirilgan.
Bayon dvigateli 6 bosqichli «mexanik» yoki 7 bosqichli «robot» bilan taʼminlangan 89 ot kuchiga ega 1,0 litrli toʻrt silindrli bazaviy T–GDI turbomotoridan iborat.
Yangilangan Bayon 2027-yil boshida Yevropadagi Hyundai dilerlariga yetkazib beriladi.
