Naked Science nashri South China Morning Post maʼlumotlariga tayanib yozishicha, yoʻlovchilar oqimining keskin oshishi Xitoy Xalq Respublikasi tashkil topgan kun munosabati bilan bayram safarlariga talab ortgani bilan bogʻliq.
Mamlakatning eng yirik temiryoʻl tugunlaridan biri hisoblangan Guanchjou janubiy vokzali bir sutkada 1252 ta poyezdga xizmat koʻrsatgan. Bu 24 soat hisobida oʻrtacha har soatiga 52 tadan ortiq poyezd degani.
Eng tigʻiz paytlarda poyezdlarni joʻnatish oraligʻi 40 soniyagacha qisqargan. Mazkur koʻrsatkich vokzal miqyosidagi qatnovlarga taalluqli.
Shu kuni Xitoy temiryoʻl tarmogʻi boʻyicha ham rekord natija qayd etilgan - bir sutkada 25,2 million yoʻlovchi qatnovi amalga oshirilgan.
China State Railway Group davlat temiryoʻl korporatsiyasi sentabr oxiridan oktabr boshigacha boʻlgan davrda jami 284 million yoʻlovchi qatnovini kutgan. Bu koʻrsatkich alohida shaxslar sonini emas, amalga oshiriladigan safarlar sonini anglatadi.
