AQSH prezidenti Donald Tramp AQSH armiyasining sobiq mayori Nidal Hasanning qatl etilishi translyatsiyasini bekor qildi. Otib oʻldirish jarayoni jonli efirda namoyish etilmaydi, biroq hukm oʻz kuchida qolmoqda - Hasanni 3-dekabr kuni qatl etish rejalashtirilgan.
«Menimcha, qatl translyatsiyasi Amerika Hasan kabi terrorchilar va ablahlarga qanday chora koʻrishini dunyoga koʻrsatadigan kuchli namuna boʻlishi mumkin edi, biroq koʻplab juda yaxshi insonlar uning oʻlimini tomosha qilmaslikni afzal koʻradi», - deb yozdi Tramp Truth Social ijtimoiy tarmogʻida.
Prezidentning qoʻshimcha qilishicha, qurbonlarning yaqinlari xohishiga koʻra qatl jarayonida shaxsan ishtirok etishi mumkin boʻladi. «Ular adolat qaror topishiga guvoh boʻlishga haqli!» - deb taʼkidladi u.
2009-yil noyabr oyida Nidal Hasan Fort-Xud bazasidagi tibbiyot markazida xizmatdoshlariga qarata oʻq uzdi. Oqibatda 13 kishi halok boʻldi, yana 30 nafardan ortiq odam yaralandi. U advokatlar xizmatidan voz kechib, oʻz xatti-harakatlarini Afgʻonistondagi musulmonlar va toliblarni himoya qilish istagi bilan izohladi. 2013-yilda harbiy tribunal uni oʻlim jazosiga hukm qildi.
Isteʼfodagi 72 nafar amerikalik general, admiral va boshqa yuqori martabali harbiylar ommaviy qatlni bekor qilishga chaqirdi. Ular oʻz ochiq xatida qatlning ommaviy namoyish etilishi «inson qadr-qimmatini yerga urishi va qurolli kuchlar shaʼniga dogʻ tushirishi», shuningdek, Hasanni jafokashga aylantirib qoʻyishi mumkinligini taʼkidlagan.
