“Toshkent xalqaro moda akademiyasini tashkil etish toʻgʻrisida”gi prezident qarori qabul qilindi.
Qarorga koʻra, Toshkent xalqaro moda akademiyasi davlat oliy taʼlim tashkiloti hisoblanadi va Yengil sanoatni rivojlantirish agentligi tizimida faoliyat yuritadi.
Akademiya Toshkent toʻqimachilik va yengil sanoat institutining Parij xalqaro moda akademiyasi bilan tashkil etilgan qoʻshma taʼlim dasturi negizida tashkil etiladi. Bunda:
qoʻshma taʼlim dasturida tahsil olayotgan barcha talabalar oʻqishini akademiyada davom ettiradi va bitiruvchilarga akademiyaning diplomi beriladi;
oʻquv jarayoni 2026/2027 oʻquv yilidan boshlanadi, talabalarni oʻqishga qabul qilish amaldagi qonunchilik hujjatlariga muvofiq umumiy belgilangan tartibda amalga oshiriladi;
qoʻshma taʼlim dasturlari bilan bir qatorda oʻz taʼlim dasturlari asosida bakalavriat yoʻnalishlari va magistratura mutaxassisliklari boʻyicha kadrlar tayyorlashga ruxsat etiladi;
2027/2028 oʻquv yilidan boshlab korxona (tashkilot) buyurtmasi asosida toʻqimachilik, tikuvchilik, trikotaj va charm-poyabzal sohalarida maqsadli kadr tayyorlashga qaratilgan dual taʼlim shakli joriy etiladi;
davlat buyurtmasi asosida turli tashkilotlar va xizmatlar uchun kiyim-bosh dizaynlarini akademiya bazasida ishlab chiqish va milliy brendlarni shakllantirish yoʻlga qoʻyiladi.
2027/2028 oʻquv yilidan boshlab yengil sanoat sohasi uchun kadrlar tayyorlovchi texnikumlarni muvaffaqiyatli tamomlagan va ballar oʻrtacha qiymati akademiya tomonidan belgilangan koʻrsatkichdan kam boʻlmagan bitiruvchilarga bakalavriatning uchinchi bosqichidan oʻqishni toʻlov-kontrakt asosida davom ettirishga ruxsat beriladi.
Qaror bilan tasdiqlangan chora-tadbirlar dasturida 2028-yil yakuniga qadar akademiya talabalari uchun davlat-xususiy sheriklik asosida 400 oʻrinli talabalar turar joyini qurib, foydalanishga topshirish nazarda tutilgan. Ungacha institutdan akademiyaga oʻqishi koʻchirib oʻtkaziladigan talabalarga institut talabalar turar joyidan belgilangan tartibda foydalanishga ruxsat beriladi.
