DW xabariga koʻra, SpaceX moliyaviy natijalarini 20-oktabr kuni eʼlon qilgan. Oʻtgan yilning uchinchi choragida kompaniya tushumi 5,6 milliard dollarni tashkil etgan edi.
Natijalar tahlilchilar kutganidan yuqori boʻlgan. Ular tushumni 12,72 milliard dollar, sof foydani esa taxminan 2 milliard dollar deb prognoz qilgandi. Hisobotdan soʻng kompaniya aksiyalari asosiy savdo sessiyasidan tashqari savdolarda qariyb 4 foizga qimmatlashgan.
Oʻsishga SI va Starlink hissa qoʻshdi
Reuters qayd etishicha, Starlink sputnik tarmogʻi va boshqa aloqa loyihalari SpaceX’ning asosiy moliyaviy tayanchlaridan biriga aylangan. Bu biznes Maskning sunʼiy intellekt sohasidagi rejalarini moliyalashtirishga ham xizmat qilmoqda.
Kompaniyaning SI yoʻnalishidagi tushumi toʻqqiz barobardan ziyod oʻsib, 7,6 milliard dollarga yetgan. Biroq oʻsishning asosiy qismi bulutli hisoblash quvvatlarini ijaraga berish hisobiga toʻgʻri kelgan. Kompaniyaning oʻz II mahsulotlari, jumladan, Grok chat-boti esa raqobatchilar fonida hali yetakchi oʻringa chiqmagan.
SI yoʻnalishi katta mablagʻ ham talab qilmoqda. SpaceX’ning jami 19,6 milliard dollarlik kapital xarajatlaridan 16,4 milliard dollari aynan shu sohaga sarflangan.
Umumiy kapital xarajatlar oʻtgan yilgi koʻrsatkichdan qariyb uch barobar koʻp. Kompaniya yaqin istiqbolda ham xarajatlar shu darajada saqlanishini kutmoqda.
Mask bolalarga aksiya berishni vaʼda qildi
19-oktabr kuni Mask X ijtimoiy tarmogʻida 2027-yilda AQShdagi har bir bolaga bittadan SpaceX aksiyasini sovgʻa qilishini yozgan. U buni kelgusidagi bir nechta shunday taqsimotning birinchisi deb atagan, ammo tashabbus qanday amalga oshirilishini tushuntirmagan.
Xabarda keltirilgan hisob-kitobga koʻra, kompaniyaning oʻsha paytdagi bahosidan kelib chiqilsa, bunday sovgʻaning umumiy qiymati taxminan 10,7 milliard dollar boʻlishi mumkin.
Mask bu bayonotni Anthropic kompaniyasi aksiyalarining kamida 5 foizini «Jamoat manfaati jamgʻarmasi»ga yoʻnaltirish niyatini eʼlon qilganidan bir kun oʻtib bergan. Soʻnggi baholash boʻyicha taxminan 48 milliard dollarga teng bu ulushdan notijorat tashkilotlariga xayriyalar yoki aholining ayrim guruhlariga toʻgʻridan toʻgʻri toʻlovlar uchun foydalanilishi mumkin.
