Reuters xabariga koʻra, sertifikatlash jarayonining yakunlanishi Boeing uchun muhim bosqich boʻldi. Kompaniya 2020-yillar boshidan beri MAX 10ʼga sertifikat olishga harakat qilib kelayotgan edi, biroq samolyotni bozorga chiqarish muddati bir necha bor surildi.
Boeing yangi modelni moliyaviy tiklanishining muhim manbalaridan biri sifatida koʻrmoqda. Aviatsiya sohasiga ixtisoslashgan IBA tahliliy kompaniyasi maʼlumotlariga koʻra, aviakompaniyalar MAX 10 uchun 1550 dan ortiq buyurtma bergan. Ushbu model Boeing’ning 737 oilasi boʻyicha hali bajarilmagan buyurtmalari portfelining 31 foizini tashkil etadi.
MAX 10 kompaniyaning tor fyuzelyajli yoʻlovchi samolyotlari bozorida Airbus bilan raqobatida ham muhim oʻrin tutadi. Sertifikatlashdagi kechikishlar davrida Yevropa ishlab chiqaruvchisining A321neo modeli yirik tor fyuzelyajli samolyotlar segmentida oʻz mavqeini mustahkamlagan.
Yangi laynerning asosiy buyurtmachilari orasida United Airlines, Alaska Airlines, Ryanair, Delta Air Lines va American Airlines bor. Koʻproq yoʻlovchi tashish imkoniyati ushbu aviakompaniyalarning parkni rivojlantirish rejalari uchun ahamiyatli hisoblanadi.
Boeing allaqachon bir nechta MAX 10 samolyotini qurib qoʻygan. Ular buyurtmachilarga yetkazib berilishini kutmoqda.
