Space.com xabariga koʻra, jadvallarni NASA’ning inson ishtirokidagi qoʻnish tizimlari - Human Landing System dasturi rahbari vazifasini bajaruvchi Stiv Krich taqdim etgan.
2028-yil boshigacha orbitada yonilgʻi quyish, kemalarni tutashtirish va Oyga ekipajsiz qoʻnish kabi muhim sinovlar rejalashtirilgan. Ularning natijasi astronavtlarni Oy yuzasiga yetkazadigan apparatni tanlashda hal qiluvchi ahamiyatga ega boʻladi.
«Artemida III» missiyasini 2027-yilning uchinchi choragida uchirish koʻzda tutilgan. Toʻrt astronavt Orion kemasida Yerning past orbitasiga chiqib, SpaceX va Blue Origin apparatlarining sinov nusxalari bilan tutashish amaliyotlarini oʻtkazadi.
Bu missiyada Oyga qoʻnish rejalashtirilmagan. Uning vazifasi - kemalar tizimlarining oʻzaro mosligini tekshirish. Natijalar asosida NASA 2028-yil boshiga moʻljallangan «Artemida IV» missiyasida qaysi apparatdan foydalanishni belgilashi kerak.
SpaceX «Artemida III» uchun mavjud Starship V3 yuqori bosqichlaridan birini oʻzgartirishni rejalashtirmoqda. Unga tutashish uzeli va burun qismining himoya qoplamasi oʻrnatiladi. NASA hujjatlariga koʻra, bu elementlarning mexanik mosligi boʻyicha tekshiruvlar yakunlangan.
2027-yilning birinchi choragida Orion bilan hamkorlikda ishlash uchun zarur tizimlarni integratsiya qilish va astronavtlarga kabina trenajyorini taqdim etish koʻzda tutilgan. Ikkinchi chorakda parvoz sinovlari, qoʻnish tayanchlarini tekshirish va ekipaj kabinasi shlyuzini sinash ishlari davom ettiriladi.
Biroq «Artemida III»da qatnashadigan Starship sinov nusxasida astronavtlar uchun kabina boʻlmaydi. U Orion bilan tutashishni namoyish etishga moʻljallangan.
SpaceX oldidagi eng murakkab vazifalardan yana biri - orbitada kemalar oʻrtasida yonilgʻi oʻtkazish. Starship Oyga yoʻl olishi uchun Yer orbitasida qoʻshimcha yonilgʻi olishi kerak.
Buning uchun maxsus tanker kemalarni oʻntagacha marta uchirish talab qilinishi mumkin. Ular yonilgʻini orbitadagi saqlash apparatiga yetkazadi, Oyga boradigan kema esa shu yerda yonilgʻi zaxirasini toʻldiradi. Kompaniya juda past haroratdagi yonilgʻini kosmosda ishonchli saqlash va bir apparatdan boshqasiga oʻtkazishni isbotlashi lozim.
«Artemida III»ning Yer orbitasidagi sinovlari uchun bunday yonilgʻi quyish talab etilmaydi. SpaceX Oyga moʻljallangan ekipajsiz Starship’ni 2027-yil uchinchi choragi oxiri yoki toʻrtinchi choragi boshida uchirib, yil yakunigacha Oyga qoʻndirishni rejalashtirmoqda.
