Oʻrtoqlik uchrashuvi 6-oktabr kuni kechqurun Buenos-Ayresdagi «Monumental» stadionida boʻlib oʻtdi.
Bahsning 10-daqiqasida oʻyin bir daqiqaga toʻxtatildi. Messi terma jamoada 10-raqam ostida oʻynagani uchun aynan shu vaqt tanlangan. Stadiondagi muxlislar oʻz sardorini olqishladi, Benin futbolchilari esa uning yoniga kelib, qoʻl berib koʻrishdi.
Messi xayrlashuv uchrashuvida Argentinaning uchala golida ham bevosita ishtirok etdi: bittasini oʻzi urdi, qolgan ikkitasiga golli uzatma berdi.
Shu tariqa, uning Argentina terma jamoasidagi hisobida 208 ta oʻyin va 126 ta gol qayd etildi.
Messi milliy jamoada 2005-yilda, 18 yoshida debyut qilgan edi. Yigirma yildan ortiq davom etgan faoliyati davomida u Argentina bilan jahon chempioni, ikki karra Amerika kubogi gʻolibi va Olimpiada chempioni boʻldi.
Uning terma jamoadagi eng katta yutugʻi 2022-yil Qatarda oʻtkazilgan jahon chempionatidagi gʻalaba hisoblanadi.
2026-yilgi mundialda ham Argentina finalgacha yetib bordi. Biroq hal qiluvchi uchrashuvda Ispaniyaga qoʻshimcha vaqtda 0:1 hisobida yutqazdi. Messi avgust oyi oxirida terma jamoadagi faoliyatini yakunlashini eʼlon qilgandi.
Futbolchining klublardagi faoliyati ham koʻplab sovrinlarga boy. U «Barselona» bilan oʻn marta Ispaniya chempioni, toʻrt marta Yevropa Chempionlar ligasi gʻolibi boʻlgan. Shuningdek, yetti marta Ispaniya kubogi va sakkiz marta mamlakat Superkubogini qoʻlga kiritgan.
Messi 2021-yilda «Barselona»dan «Pari Sen-Jermen»ga oʻtdi va Fransiya klubi bilan ikki marta chempion boʻldi. 2023-yildan buyon esa AQShning «Inter Mayami» jamoasida toʻp surmoqda.
Sakkiz karra «Oltin toʻp» sohibi terma jamoa bilan xayrlashgan boʻlsa-da, klubdagi faoliyatini davom ettirmoqda.
